Jeti jastaǵy qyzdy zorlap, óltirgen qylmysker ómir boıyna bas bostandyǵynan aıyryldy
ATYRAÝ. KAZINFORM - Atyraý oblysy Jylyoı aýdany Qulsary qalasynda 7 jasar qyzdy zorlap, óltirgen qylmysker ómir boıyna bas bostandyǵynan aıyryldy. Úkimdi Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına oqydy.
35 jastaǵy Jylyoı aýdany turǵynyń kinási tolyqtaı dáleldendi. Endi ol jazasyn erekshe qaýipsizdik rejımindegi mekemede óteıtin bolady.
Qylmystyq is kámeletke tolmaǵanǵa qatysty zorlaý (QK 120-baby 4-bóligi) jáne kámeletke tolmaǵan balany qasaqana óltirý (QK 99-baby 3-bóligi) boıynsha qaraldy.
Sot-medıtsınalyq saraptama kishkentaı qyzdyń denesinen soqqy izderi men jynystyq zorlyq belgilerin anyqtalǵan.
Eske salaıyq, oqıǵa 2025 jyldyń 5 maýsymynda Atyraý oblysynyń Qulsary qalasynda boldy. Aldymen 7 jastaǵy qyzdyń joǵalyp ketkeni týraly aqparat tarady.
Qyz bala Qursaı ózeniniń jaǵalaýynda serýendep júrip, úıine qaıtyp bara jatqanda adasyp ketip, jolda sottalýshy keziktirgen.
Ol alkogoldik masań kúıde bolyp, oǵan úıine baratyn joldy kórsetetinin aıtyp aldaǵan, ózimen birge júrýdi usynǵan.
Qyzdy jańylystyryp, ony ózen jaǵasyna aparyp, dármensiz kúıin paıdalanyp, kúsh qoldanyp, zorlaǵan.
Jasaǵan qylmysyn jasyrý maqsatynda ol balany uryp-soǵyp, keıin ózenge batyryp jibergen.
Sottalýshynyń kinási kýálardyń aıǵaqtarymen, oqıǵa bolǵan jerdi qaraý hattamasymen, beınejazbalarmen jáne saraptama qorytyndylarymen tolyq dáleldendi.
Aıta keteıik, Atyraýda birge turatyn áıel men erkektiń arasyndaǵy janjal kisi ólimimen aıaqtaldy.