Atyraý oblysynda 7 aıda 72 adamnan qaterli ókpe obyry tabylǵan

ATYRAÝ. KAZINFORM – Atyraý oblysynda 7 aıda 72 adamnyń ókpeniń qaterli isigine shaldyqqany anyqtalyp otyr.

Atyraý óńirlik kommýnıkatsııalar qyzmetiniń aqparatyna qaraǵanda, oblystyq onkologııa dıspanserinde ókpeniń qaterli isigin erte dıagnostıkalaý boıynsha ashyq esik kúni bastalǵan. Al, dáriger-onkolog Gaýhar Qarıshovanyń deregine súıensek, bul aýrýǵa 40 jastan asqan turǵyndar shaldyǵady.

«Ashyq esik kúnderiniń maqsaty – turǵyndardy qaterli isikterdiń qaýpi men damý faktorlary, erte dıagnostıkalaý múmkindikteri, ásirese, ókpe obyryn erte anyqtaýdyń mańyzy týraly habardar etý. Statıstıkaǵa sáıkes, byltyr Atyraý oblysynda 59 adamnan ókpeniń qaterli isigi anyqtaldy. Al, bıyl jeti aıda bul aýrýǵa shaldyqqan naýqastar sany 72 adamǵa jetti», - deıdi Gaýhar Qarıshova.

Onyń aıtýynsha, ókpe obyrynyń birneshe belgisi bar. Bastapqyda uzaq merzimdi jótelmen bastalady.

«Jótel aldymen qurǵaq kúıinde bolady. Sodan keıin jeńil qaqyryq túsedi. Keıde qan aralasqan qaqyryq bolýy múmkin. Osyndaı belgi baıqalǵan adam der kezinde em qabyldamasa, qaqyryq irińge aınalady. Naýqastyń dene temperatýrasy kóterilip, oǵan álsizdik pen entigý qosylady. Keıin qaterli isik pnevmonııasyna ulasady. Al, qatty asqynǵan jaǵdaıda daýys qarlyǵyp, júregi nemese qolynda aýyrsyný baıqalady. Beti kógerip, isinedi. Moıynynda, qoly men keýde qýysynyń tamyrlarynda isik paıda bolady», - dedi Gaýhar Qarıshova.

Eske sala ketelik, buǵan deıin Atyraýda qaraqurt shaqqan 13 adam aýrýhanaǵa túskenin  habarlaǵan bolatynbyz.