Atyraý oblysynda 60 aýyldyń oqýshylary mektepke tasymaldanady

ATYRAÝ. KAZINFORM – Atyraý oblysynda 60 aýyldyń oqýshylaryn mektepke tasymaldaý josparlanyp otyr. Osy maqsatqa 21 avtobýs satyp alynady.

Atyraý oblystyq bilim berý basqarmasy basshysynyń orynbasary Oryntaı Bımanovanyń aıtýynsha, oqýshylarǵa orta bilim beretin 204 mektep bar. 

«Bıyl 14 700 oqýshy birinshi synypqa qabyldanady. Mektep tabaldyryǵyn alǵash attaıtyn oqýshylardyń 85%-y qazaq synybyn tańdap otyr. Al, 15%-y orys synybynda oqýdy kózdegen. Óńirdegi mektepterde 58 600 oqýshy ystyq tamaqpen qamtylady», - dedi Oryntaı Bımanova.

Onyń deregine qaraǵanda, Jylyoı aýdanynda sý tasqynynan 10 mektep zardap shekken. Qazir 7 bilim ordasyna ortasha, 1 mektepte kúrdeli jóndeý jumysy bastalǵan. Bul aýdanda jańadan 2 mektep salynady. 

«Oblysta erekshe bilim berýdi qajet etetin 7 385 oqýshy tirkelip otyr. Al, 60 eldi mekendegi 5 821 oqýshy bilim ordasyna tasymaldanady. Bul úshin 21 avtobýs satyp alynady», - dep málim etti Oryntaı Bımanova.

Eske sala ketelik, buǵan deıin Atyraý oblystyq bilim basqarmasynyń basshysy taǵaıyndalǵanyn habarlaǵan bolatynbyz.