Atyraý oblysynda 6 jyl buryn bastalǵan 26 shaqyrym joldy jóndeý jumysy áli bitpegen

ATYRAÝ. KAZINFORM – Atyraý oblysynda 6 jyl buryn 26 shaqyrym joldy kúrdeli jóndeý bastalǵan. Alaıda, atalǵan joldy jóndeý jumysy áli bitpeı tur.

Cybaılas jemqorlyqqa qarsy is-qımyl agenttiginiń Atyraý oblysy boıynsha departamenti qala men aýdandarda salynyp jatqan joldyń sapasyna únemi baqylaý júrgizip keledi.

«Jaqynda departament basshylary Qurmanǵazy aýdanyndaǵy avtomobıl jolynyń jóndeý barysyna monıtorıng júrgizdi. Máselen, 2018 jyly uzyndyǵy 26 shaqyrymdy quraıtyn «Ganıýshkın-Prımore-Ýtera-Kotıaev» avtomobıl jolyn kúrdeli jóndeý bastalǵan. Shart somasy – 4,2 mlrd teńge. Merdigerlikke «Beket Sat Jol» JShS tańdalǵan. Tapsyrysty oblystyń jolaýshylar kóligi jáne avtomobıl joldary basqarmasy bergen. Monıtorıng kezinde qurylys-montajdaý jumystary júrgizilmeıtini, jol jabynynyń joǵarǵy qabaty tóselmegeni, kúrdeli jóndeý osy kúnge deıin aıaqtalmaǵany anyqtaldy», -dep habarlady departamenttiń baspasóz qyzmeti.

Merdiger kompanııa munyń sebebin qurylys materıaldarynyń qymbattaýy jáne pandemııamen baılanystyrǵan. Osyǵan baılanysty smetalyq qujattamaǵa buryn kózdelmegen jumystardy qosyp, qosymsha kelisim jasasý josparlanyp otyr.

«Byltyr «Jol aktıvteri sapasynyń ulttyq ortalyǵy» RMK-nyń Atyraý fılıaly tekserý júrgizip, asfaltbeton jamylǵysynan usaq túıirli qıyrshyqtastyń bólinýi túrindegi eleýli aqaýdy anyqtaǵan bolatyn. Merdiger bul aqaýdy búgingi kúnge deıin qalpyna keltirmedi. Al sońǵy monıtorıngte jol jabynynyń shógýi anyqtaldy», -dep málim etti departamenttiń baspasóz qyzmeti.

Osyǵan baılanysty tapsyrys berýshige eskertý jasalǵan. Al, anyqtalǵan kemshilikterdi joıýǵa ýaqyt berilip otyr.

Eske sala ketelik, buǵan deıin Atyraýda salynyp jatqan 2 jaıly mekteptiń qurylysynan kemshilik anyqtalǵanyn jazǵan bolatynbyz.