Atyraý oblysynda 5 aıda zańsyz aınalymnan 7,9 keli esirtki alyndy
ATYRAÝ. KAZINFORM – Atyraý oblysynyń polıtseıleri 5 aıda zańsyz aınalymnan 7,9 keli esirtki tárkiledi.
Atyraý oblystyq polıtsııa departamentiniń esirtki qylmysyna qarsy is-qımyl basqarmasy bastyǵynyń orynbasary Roman Ermuhanovtyń aıtýynsha, jyl basynan beri esirtki qylmysymen baılanysty 74 derek tirkelgen.
«Sońǵy kezde jastar arasyndaǵy zańsyz esirtkige áýestik ózekti máselege aınalyp otyr. Máselen, ótken jyly zańsyz aınalymnan 5 keli 487 gramm esirtki tárkilengen edi. Al, bıylǵy 5 aıda zańsyz aınalymnan 7 keli 961 gramm esirtki zattary alyndy. Osyǵan baılanysty quqyq qorǵaý organdary jedel profılaktıkalyq is-sharalar ótkizýdi qolǵa aldy. Sondaı is-sharanyń birinde Atyraý qalasynyń turǵyny zańsyz fıtozerthana uıymdastyrǵany úshin ustaldy. Kúdiktiden 68 túp sora ósimdigi tárkilendi», - dedi Roman Ermuhanov.
Eske sala ketelik, budan buryn Atyraýda 1 keliden astam sıntetıkalyq esirtki satpaq bolǵan eki kúdikti ustalǵanyn habarlaǵan edik.
Tekserý kezinde 21 jáne 25 jastaǵy eki kúdiktiniń Taraz qalasynan Atyraýǵa esirtki satýǵa kelgeni anyqtaldy. Kúdiktilerdiń turǵyn jaıynan 1 kelige jýyq sıntetıkalyq esirtki tárkilendi. Atyraý qalasynyń aýmaǵynda satý úshin jasyryn orynǵa tyqqan 300-den astam oramǵa oralǵan sıntetıkalyq esirtki tabyldy.
