Atyraý oblysynda 5 aýyldyq okrýg ákiminiń saılaýy ótedi

Atyraý oblysynda 10 jeltoqsanda 5 aýyldyq okrýg ákiminiń saılaýy ótedi. Aýyldyq okrýgtiń tórteýi Qurmanǵazy aýdanynda, bireýi Jylyoı aýdanynda ornalasqan, dep habarlaıdy Kazinform.

Oblystyq aýmaqtyq saılaý komıssııasynyń málimetine súıensek, Qurmanǵazy aýdanyndaǵy Bókeıhan, Nurjaý aýyldyq okrýgteri ákiminiń ókilettik merzimi 27 jeltoqsanda aıaqtalýǵa tıis. Atalǵan aýdannyń Azǵyr, Kýdrıashov, Jylyoı aýdanyndaǵy Qosshaǵyl aýyldyq okrýgi ákiminiń ókilettigi 30 qazanǵa deıin merziminen buryn toqtatylǵan.

«Osyndaı sebepke baılanysty atalǵan aýyldyq okrýgterde ákim saılaýy taǵaıyndaldy. Saılaý 10 jeltoqsanda ótedi», -delingen aýmaqtyq saılaý komıssııasynyń aqparatynda.

Qurmanǵazy aýdanyndaǵy Bókeıhan aýyldyq okrýgi Reseımen shekaradaǵy Qıǵash ózeniniń jaǵalaýynda ornalasqan. Buryn bul aýyldyń ataýy Kotıaev, al, okrýg Baıda dep atalǵan edi.

Shekaradaǵy aýyl turǵyndary birneshe ret aýyldyń da, okýrgtiń de ataýyn ózgertý týraly eki usynys aıtqan. Onyń birinshici – Kotıaev ataýyn Bókeı han dep ózgertip, okrýgtiń ataýyn burynǵysha qaldyrý. Al, ekinshi usynysta okrýgke de, aýylǵa da qazaqtyń birtýar tulǵasy Bókeıhannyń atyn berý usynylǵan.

Byltyr turǵyndardyń usynysy oblystyq máslıhattyń sessııasynda qaraldy. Depýtattar turǵyndardyń ekinshi usynysyna qoldaý bildirdi. Sóıtip, oblystyq máslıhattyń sheshimimen okrýgke de, aýylǵa da Bókeı han ataýy berildi.

Eske sala ketelik, budan buryn Atyraý oblysynda Reseımen shekaradaǵy aýyldar ataýy ózgergenin habarlaǵan bolatynbyz.