Atyraý oblysynda 4 jyl buryn bastalǵan stadıondy jańartý jumysy aıaqsyz qaldy
ATYRAÝ.KAZINFORM – Atyraý oblysy Qurmanǵazy aýdanynyń ortalyǵyndaǵy stadıondy jańǵyrtý jumysy aıaqsyz qaldy. 922 mln teńge qaralǵan jobanyń turyp qalýyna merdiger mekemeniń jumysty ýaqytyly oryndamaýy sebep bolyp otyr.
Qurmanǵazy aýdandyq qurylys bóliminiń málimetinshe, 2022 jyldyń qarashasynda bastalǵan jańǵyrtý jumysy jospar boıynsha bir jylda aıaqtalýy tıis. Alaıda «GradStroıServıs» JShS mindetin kórsetilgen merzimde oryndaı almaǵan. Tapsyrys berýshi Atyraý oblysynyń mamandandyrylǵan aýdanaralyq ekonomıkalyq sotyna merdigerdi josyqsyz dep taný týrady talap aryz joldaǵan. Biraq sot ony qanaǵattandyrýsyz qaldyrdy.
– 2024 jyly merdigerden 8 854 000 teńge turaqsyzdyq aıyppuly óndirildi. Qazirgi tańda merdiger mindettemelerdi oryndamaýyna baılanysty Memlekettik satyp alý zańynyń 18 babynyń 4 tarmaǵynyń 2 tarmaqshasynyń negizinde elisimshart birjaqty buzyldy, - dep málimdedi aýdandyq qurylys bólimi.
2024 jyly Atyraý oblysy boıynsha tekserý komıssııasy bólimge bólingen bıýdjet qarajatynyń tıimdiligine, sondaı-aq «Aýyl – el besigi» jobasy sheńberinde qurylys obektileriniń júzege asyrylý tıimdiligine aýdıt júrgizgen.
– 2024 jyldyń 11 jeltoqsandaǵy №1 nusqamasy negizinde «Qurmanǵazy aýylyndaǵy ortalyq stadıondy qaıta jańartý» nysany boıynsha merdiger mekeme «GradStroıServıs» JShS-ne oryndalmaǵan jumystarǵa tólengen 53 mln 300 myńǵa jýyq qarjyny bıýdjet kirisine óndirý jóninde Atyraý oblysynyń mamandandyrylǵan aýdanaralyq ekonomıkalyq sotyna talap joldanyp, qanaǵattandyryldy. Osyǵan sáıkes Atyraý oblysynyń mamandandyrylǵan aýdanaralyq ekonomıkalyq sotyna atalǵan sheshim boıynsha atqarý paraǵyn shyǵarý jóninde hat joldandy, - dep túsindirdi qurylys bólimi.
Búginde nysannyń qurylysy toqtap tur. Jańa merdigerdi anyqtaý úshin qajetti túzetilgen smetalyq qujattama osy ýaqytqa deıin bekitilmegen. Qurylys jumystarynyń uzaqqa sozylýy jáne jobada kórsetilgen materıaldardyń baǵasynyń qymbattaýy saldarynan nysannyń tehnıkalyq jaı-kúıi nasharlap, tozý qaýpi týyndap otyr.
– Bólimmen nysannyń qurylysyn aıaqtaý maqsatynda qalǵan jumystardyń esebi shyǵarylýda. Atalaǵan jumystary aıaqtalǵannan keıin qurylys jumystaryn jalǵastyrý úshin jańa merdigerdi anyqtaý josparlanýda, - dep málimdedi aýdandyq ákimdik.
Jalpy bul stadıon 1985 jyly salynǵan, kólemi – 2.14 ga. Atalǵan nysanǵa 1989 jyly kúrdeli jóndeý, 2002 jyly jaı jóndeý jumystary júrgizilgen. Stadıon 500 orynǵa laıyqtalǵan. Nysan aýmaǵynda eki qabatty ǵımarat salynyp, onda sport zaldary, kúres jáne ústel oıyndaryna arnalǵan bólmeler, májilis zaly, jattyqtyrýshylar kabınetteri men medıtsınalyq pýnkt qarastyrylady. Sonymen qatar fýtbol alańy, basketbol jáne voleıbol alańdary, júgirý jolaǵy bolady.Joba múmkindigi shekteýli jandarǵa da beıimdelip, trıbýnaǵa kirýge arnalǵan kótergish qurylǵy men pandýs ornatý kózdelgen.
Buǵan deıin Atyraý qalasynda kópqabatty 7 úıdiń qurylysy 3 jyldan beri toqtap turǵanyn jazǵan edik.
