Atyraý oblysynda 4 kúnnen beri iz-túzsiz joǵalǵan azamattyń denesi tabyldy

KAZINFORM. ATYRAÝ — Atyraý oblystyq TJD málimetinshe, 2025 jylǵy 19 jeltoqsanda saǵat 15:10 shamasynda izdestirý tobynyń kúshimen Kaspıı teńiziniń jaǵalaýyndaǵy «Botahan» ken ornynyń mańynan tabyldy.

Marqum 14 jeltoqsan kúni qasyndaǵy birneshe azamatpen ańshylyqqa shyǵyp ketken. 15 jeltoqsanda saǵat 23:00–de Atyraý oblysy TJD Jedel basqarý ortalyǵyna 1964 jyly týǵan azamattyń habar-osharsyz ketkeni týraly habarlama túsken. Aqparat túsken sátten bastap izdestirý-qutqarý jumystary uıymdastyryldy.

— 16 jeltoqsanda Jylyoı aýdany aýmaǵyndaǵy Botahan ken ornynan 30 shaqyrym qashyqtyqta ÝAZ markaly avtokólik tabyldy. Alaıda kólik ishinde joǵalǵan azamat bolmady. Osyǵan baılanysty atalǵan aýmaqta áýe barlaýyn júrgizý úshin TJM tikushaǵy tartylyp, 20 shaqyrym radıýstaǵy jer aýmaǵy tekserildi. Іzdestirý jumysty 4 kún boıy júrgizildi, — dep habarlady TJD baspasóz qyzmeti.

TJD kúshteri men quraldary, QR QM 99245 áskerı bóliminiń jeke quramy, polıtsııa departamentiniń qyzmetkerleri jáne týystarynan jalpy 100 adam, 21 tehnıka, 2 kınologııalyq eseptop izdestirý jumysyna jumyldyrylǵan edi.

Atyraý oblystyq polıtsııa departamentiniń baspasóz qyzmeti tıisti tekseris jumysy jalǵasyp jatqanyn málimdedi.

Buǵan deıin BQO-da adasyp ketken malshy bir kúnnen keıin tabylǵany jóninde jazǵan edik.