Atyraý oblysynda 4 kásiporyn jumysshylarǵa 33 mln teńge jalaqy qaryz
ATYRAÝ. KAZINFORM – Atyraý oblysynda byltyr memlekettik eńbek ınspektorlary 28 kásiporynnyń 223 jumysshyǵa 66 mln teńge eńbekaqy bereshegi baryn anyqtady. Jyl sońyna deıin 24 mekemeden 165 jumysshynyń 33 mln teńge jalaqy bereshegi ótelgen.
Atyraý oblystyq memlekettik eńbek ınspektsııasy basqarmasynyń basshysy Igilik Áýbákirovtiń málimetine súıensek, byltyr jumysshylar 2158 shaǵym túsken. Bul aldyńǵy jyldan 26 paıyzǵa artqan.
«Shaǵymnyń deni jalaqyny ýaqytynda tólemeý, jumystan zańsyz shyǵarý, eńbek shartyn jasamaý, qaýipsizdik talabyn saqtamaý sekildi máselelerdi qamtydy. Eńbek kodeksiniń talabyn buzǵan kásiporyndarǵa 17 mln teńgeniń aıyppuly salyndy. Jumysshynyń eńbekaqysyn tólemeý – áleýmettik jaǵdaıyna áser beretin faktor. Sol sebepten, eńbekaqyny kidirtý men tólemeý jaǵdaıyna jol bermeý úshin tıisti organdarmen birlesip, júıeli túrde monıtorıng jumystaryn júrgizýdemiz. Qazir jeke sot oryndaýshylary úsh mekemeden 20 jumysshyǵa 11,6 mln teńge jalaqy bereshegin májbúrli túrde óndirý jumysyn qolǵa aldy. Al, «GazStroıMontaj KZ» JShS-da 38 jumysshyǵa 21,4 mln teńge jalaqy bereshegi qalyptasqan. Osyǵan baılanysty tıisti jumys atqarylyp jatyr», - dedi Igilik Áýbákirov.
Onyń aıtýynsha, ár jumysshy Eńbek kodeksiniń talabyn bilý qajet. Zań tabalyn bilý óz quqyǵyn qorǵaýǵa jol ashady.
«Azamattar Eńbek kodeksiniń 33-babynyń 3-tarmaǵy negizinde jumys berýshimen «Eńbek shartyn» jasamaı, jumysqa kirisýden bas tartýy qajet. Máselen, jastar kanıkýl kezinde tamaqtaný, kólik jýý, iri sýpermarketter sekildi oryndarda ýaqytsha jumysqa ornalasady. Biraq, kópshiligi eńbek sharttyna qol qoımaı, ózderiniń eńbek quqyǵyna nuqsan keltiretinin eskermeıdi. Mundaı keleńsizdiktiń aldyn alý úshin Eńbek kodeksiniń 33-babynyń 1-tarmaǵyna sáıkes jumys berýshiden mindetti túrde eńbek shartyn talap etkeni jón», -dedi Igilik Áýbákirov.
Eske sala ketelik, buǵan deıin Atyraýda on kúnde 321 júrgizýshiden 7,8 mln teńge aıyppul óndirilgenin jazǵan edik.
