Atyraý oblysynda 4 aıda 48,6 mln teńgeniń jalaqy bereshegi óndirildi

ATYRAÝ. KAZINFORM – Atyraý oblysynda jyl basynan beri jumys berýshiler 48,6 mln teńgeniń jalaqy bereshegin ótegen.

Memlekettik eńbek ınspektsııasy komıteti Atyraý oblysy boıynsha departamentine 4 aıda jumysshylardan 788 ótinish túsken. Osy kezeńde 752 ótinish qaralyp, 402 azamattyń konstıtýtsııalyq quqyǵy qorǵalǵan.

– Azamattardan túsken ótinish negizinde kásiporyndarǵa tekserý júrgizý, nusqama engizý, ákimshilik is qozǵaý sekildi sharalar qabyldandy. Sonyń nátıjesinde 10 kompanııadan 11,4 mln teńge jalaqy bereshegi óndirilip, 14 jumysshynyń eńbek quqyǵy qorǵaldy. Jumys berýshilerge tıisti túsindirý júrgizý arqyly 18 jumysshynyń 37,2 mln teńge jalaqysy óndirilip, aryzdary ótinish hat negizinde qaraýsyz qaldyryldy, - deıdi departament basshysy Igilik Áýbákirov.

Eńbek ınspektorlary 4 aıda jumys berýshilerge 93 tekserý júrgizgen. Tekserý qorytyndysymen 99 eńbek zańdylyǵyn buzý deregi anyqtalǵan.

– Zań buzýshylyqtardy joıý týraly jumys berýshilerge 62 nusqama berildi. Al 47 zańdy tulǵa ákimshilik is qozǵalyp, 8,6 mln teńge aıyppul salyndy. Eńbek zańnamasynyń saqtalýyn qamtamasyz etýdi surap, departamentke júgingen 827 azamatqa quqyqtyq kómek kórsetildi, - dep málim etti Igilik Áýbákirov.

Eske sala ketelik, buǵan deıin atyraýlyq zańger kompanııadan 6,1 mln teńge jalaqysyn óteýdi talap etkenin habarlaǵan edik.