Atyraý oblysynda 33 bala mingen avtobýs balshyqqa batyp qaldy
ASTANA. KAZINFORM – Atyraý oblysynda ishinde 33 bala bolǵan avtobýs joldyń aınalma bóliginde balshyqqa batyp qalyp, polıtseılerdiń kómegimen qaýipsiz jerge shyǵaryldy, dep habarlaıdy Polisia.kz.
Oqıǵa Atyraý – Inder tasjolynyń 178-shaqyrymynda, jol jóndeý jumystary júrgizilip jatqan ýchaskede bolǵan.
Polıtsııanyń málimetinshe, osy baǵytta qyzmet atqaryp júrgen patrýldik polıtsııa rotasynyń qyzmetkerleri Samat Daýkenov pen Dáýren Jalaýov oqıǵa ornyna dereý jetip, kómek kórsetýge kirisken.
– Tártip saqshylary jaǵdaıdy jedel baǵalap, jol jóndeý jumystaryn júrgizip jatqan merdiger uıymnyń qyzmetkerlerin tartyp, qajetti arnaıy tehnıkany uıymdastyrdy. Arnaıy júk kóliginiń kómegimen avtobýsty qaýipsiz jerge shyǵarý jumystary júrgizildi, – delingen habarlamada.
Alǵashqy súıreý kezinde tros úzilip ketkenimen, polıtseıler qosymsha qural-jabdyqtar jetkizip, avtobýsty joldyń qaýipsiz bóligine shyǵarýǵa yqpal etken.
Polıtseılerdiń úılesimdi ári jedel áreketiniń nátıjesinde 33 balanyń qaýipsizdigi qamtamasyz etilip, avtobýs baǵytyn ári qaraı jalǵastyrdy.
Aıta keteıik, Semeıde eki bala sýǵa batyp ketti.
