Atyraý oblysynda 31 myń gektar ıgerilmegen jer memleket menshigine qaıtaryldy

ATYRAÝ. KAZINFORM — Atyraý oblysy prokýratýrasynyń qadaǵalaý aktileri nátıjesinde jalpy kólemi 31 432 gektar, quny 196 mln teńge bolatyn 16 jer ýchaskesi memleket menshigine qaıtaryldy.

Oblys prokýratýrasy taratqan málimetke sáıkes, bul ýchaskeler jer zańnamasynyń talaptaryna sáıkes paıdalanylmaǵan.

- Mysaly, 137 jer qoınaýyn paıdalanýshy memleketke aýyl sharýashylyǵy shyǵyndaryn óteýge tıis bolǵanymen, 65 mln teńgeni ýaqytyly tólemegen. Prokýratýra aralasýynan keıin búginge deıin 13,8 mln teńge memleket kirisine óndirildi.

Sondaı-aq, «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵyn tekserý kezinde senimgerlik basqarý sharty buzylǵany anyqtaldy. Sonyń nátıjesinde, «Atyraý Neftehım» JShS-ne tıesili, maqsatyna sáıkes ıgerilmegen, quny 1,6 mlrd teńge turatyn 106 gektar jer ýchaskesi AEA menshigine qaıtaryldy. Seriktestik óz mindettemelerin oryndamaǵandyqtan, AEA qatysýshylary qatarynan shyǵaryldy, - delingen aqparatta.

Taǵy bir jaǵdaıda, uzaqqa sozylǵan sot protsesteri nátıjesinde, prokýrorlyq qadaǵalaý aktisiniń negizinde «Kıpros» JShS-ne tıesili, Atyraý qalasyndaǵy pırs salýǵa arnalǵan 3,46 gektar jer maqsatyna sáıkes paıdalanylmaǵany úshin memleketke qaıtaryldy. Bul jer teliminiń naryqtyq quny – 250 mln teńge.

Oblys prokýratýrasy jer zańnamasynyń oryndalýyn qatań baqylaýda ustap otyr.

Aıta keteıik, Almatyda memleket qajettiligine 30-dan astam jer telimi alynady.