Atyraý oblysynda 29 jastaǵy áıel júktiliktiń 36-aptasynda qaıtys boldy

Atyraý oblysynda 29 jastaǵy áıel júktiliktiń 36-aptasyn ótkerip júrgen. Alaıda, jiti respıratorly vırýsty ınfektsııa (JRVI) dıagnozymen aýrýhanaǵa túsip, bir kúnnen soń kóz jumǵan, dep habarlaıdy Kazinform.

Oblystyq densaýlyq saqtaý basqarmasynyń baspasóz qyzmeti rastaǵan derekke qaraǵanda, oqıǵa Mahambet aýdanynda tirkelgen.

Mahambet aýdanynyń turǵyny júktiliktiń 36-aptasynda jergilikti aýrýhana dárigerleriniń kómegine júgingen. Buǵan onyń densaýlyǵyndaǵy ózgeris sebep bolǵan. Jergilikti dárigerler 5-shi jeltoqsanda júkti áıelge JRVI belgisimen medıtsınalyq «jedel farıngıt» dıagnozyn qoıǵan. Alaıda naýqas kelesi kúni qaıtys bolǵan.

«Qazir 29 jastaǵy júkti áıeldiń qaıtys bolýyna baılanysty sot-medıtsınalyq saraptama taǵaıyndaldy. Júkti áıeldiń qaıtys bolý sebepteri anyqtalyp jatyr. Sarapatama qorytyndysy belgili bolǵannan keıin tolyq beriledi», - dep habarlady densaýlyq saqtaý basqarmasynyń baspasóz qyzmeti.

Eske sala ketelik, buǵan deıin Atyraýda 51 jastaǵy áıel emhanada alǵan ýkoldan soń kóz jumǵanyn jazǵan bolatynbyz.

Atyraý qalasyndaǵy №1 emhanada saǵat 9:15 shamasynda 1972 jylǵy áıelge ýkol salynǵan. Alaıda, patsıenttiń jaǵdaıy nasharlaǵan. Emhana dárigerleri jedel járdem shaqyrǵan.

Biraq, saǵat 9:51 shamasynda patsıenttiń bıologııalyq ólimi tirkelgen. Qazir sot-medıtsınalyq saraptama taǵaıyndaldy.