Atyraý oblysynda 24 stıhııalyq qoqys alańy áli tazalanbaǵan

Bıyl Atyraý oblysynda ruqsat etilmegen 107 qoqys alańy anyqtalǵan. Onyń ishinde 24-i áli tazalanbaǵan, dep habarlaıdy QazAqparat tilshisi. 

Oblystyq Ekologııa departamentiniń baspasóz qyzmetinen málim etkendeı, bıyl kosmostan monıtorıng júrgizýdiń qorytyndysy boıynsha anyqtalǵan stıhııalyq qoqys alańdarynyń 83-i joıylǵan.

«Qazir tazalanbaǵan 24 qoqys alańy bar. Onyń ishinde Atyraý qalasynyń aýmaǵynda 8 alań tirkelgen. Al Mahambet aýdanyndaǵy 8 oryn ruqsat etilgen polıgon aýmaǵynda ornalasqan. Jylyoı aýdanynda tazalanbaǵan 8 qoqys alańy anyqtalyp otyr», - dep habarlady departamenttiń baspasóz qyzmeti.

Departament mamandary tazalanbaǵan qoqys alańdaryn baqylaýǵa alǵan. Qoqys alańdary qazan aıynyń sońyna deıin tazalanatyny josparlanǵan.

Eske sala ketelik, budan buryn Atyraý turǵyny Jaıyq ózenindegi sýdyń jasyl túsine alańdaýshylyq bildirgenin habarlaǵan bolatynbyz.

Atyraý qalasynyń turǵyny Artýr Zaınýllın áleýmettik jelige Jaıyq ózeniniń jaǵalaýyndaǵy ahýal týraly vıdeo júktedi. Onyń aıtýynsha, ózen sýy jasyl túske boıalǵan.

Osyǵan baılanysty oblystyq Ekologııa departamentiniń mamandary Jaıyq ózeninen sý synamasyn alǵan.

«Áleýmettik jelige júktelgen vıdeojazbalarǵa monıtorıng júrgizildi. Departamenttiń zerthanalyq-taldama baqylaý bóliminiń mamandary Jaıyq ózeniniń Atyraý qalasyndaǵy Kókarna shaǵynaýdany tusynan sý synamasyn aldy. Synamany taldaý qorytyndysy keıin habarlanady», - dep málim etti departamenttiń baspasóz qyzmetinen.