Atyraý oblysynda 2 309 adam qyzylsha juqtyrǵan

Atyraý oblysynda byltyrǵy 2 naýryzdan beri 6 998 adamda alǵashqy dıagnozben qyzylshany juqtyrý kúdigi anyqtalǵan. Keıin zerthanalyq taldaý qorytyndysymen 2 309 adamnyń atalǵan dertti juqtyrǵany dáleldendi, dep habarlaıdy Kazinform.

Atyraý oblystyq sanıtarııalyq-epıdemıologııalyq baqylaý departamentiniń baspasóz qyzmetinen málim etkendeı, qyzylsha dertin juqtyrýdyń alǵashqy deregi byltyrǵy 2 naýryzda tirkelgen.

«Bıylǵy 7 qańtarǵa deıin zerthanalyq taldaý nátıjesimen 2 309 adamnan qyzylsha aýrýy anyqtaldy. Naýqastardyń arasynda basqa el men qalalardan kelgen 8 adam bar. Onyń ishinde Túrkııadan 3, Tájikstannan 2, Birikken Arab Ámirliginen 1, Almaty qalasynan 1, Astanadan 1 adam qyzylshany juqtyryp kelgen», - deıdi departament ókili Aıkórkem Nurǵalıqyzy.

Onyń aıtýynsha, qyzylsha juqtyrǵandardyń basym bóligi — 1-14 jasqa deıingi balalar. Naýqastardyń 80 paıyzynyń qyzylshaǵa qarsy vaktsına almaǵany anyqtalyp otyr.

Eske sala ketelik, budan burynAtyraýdaǵy órtte kúıip qalǵan úsh aılyq sábı aýrýhanada kóz jumǵanyn jazǵan edik.