Atyraý oblysynda 22 myń gektar jer ýchaskesi memleket menshigine qaıtaryldy

ATYRAÝ. KAZINFORM – Atyraý oblysynda aýyl sharýashylyǵy maqsatynda paıdalanylmaǵan 22 myń gektar jer ýchaskesi memleket menshigine qaıtarylǵan.

Atyraý oblystyq Jer qatynastary basqarmasy basshysynyń orynbasary Álibek Ermekqalıdyń málimetinshe, bıyl ıgerilmegen 90 myń gektar jer ýchaskesin memleket menshigine qaıtarý josparlanyp otyr.

«Jer Kodeksine engizilgen ózgertýlerge sáıkes endi jer teliminiń 50 paıyzy paıdalanylmaǵan jaǵdaıda memleket menshigine qaıtarylady. Oblys aýmaǵynda paıdalanylmaǵan, merzimi ótken bos jer telimderi ǵaryshtyq monıtorıng arqyly anyqtalady. Qazir monıtorıngtik top músheleri ıelerine merzimi ótken bos jer telimderin óz erkimen qaıtarý jóninde túsindirý jumysyn júrgizýdi qolǵa aldy. Sonyń nátıjesinde turǵyndar jer telimderiniń kóp bóligin óz erkimen qaıtardy. Endi olarǵa qaıtadan konkýrs qatysyp, jer telimin ıelený múmkindigi beriledi», -deıdi Álibek Ermekqalı.

Onyń deregine súıensek, 2022-2023 jyldary 400 myń gektardan astam jer telimi qaıtarylǵan. Onyń ishinde byltyr 275 jer telimi memleket menshigine ótkizilgen.

«Memleket menshigine qaıtarylǵan jer telimderi úshin qaıtadan konkýrs ótkiziledi. Bıyl jeti aıda 87 jer ýchaskesi konýkýrs arqyly qaıtadan jer paıdalanýshylarǵa berildi», - dep málim etti Álibek Ermekqalı.

Eske sala ketelik, budan buryn Atyraýdyń Maqat aýdanynda 130 gektar jer telimi memleket menshigine qaıtarylǵanyn habarlaǵan bolatynbyz.