Atyraý oblysynda 21 kásipker qaıtarymsyz grant qarjysyn maqsatsyz jumsaǵan

ATYRAÝ. KAZINFORM – Atyraý oblysynda 21 kásipkerdiń qaıtarymsyz grant qarjysyn maqsatsyz jumsaǵany anyqtalyp otyr. Endi olar grant qarjysyn bıýdjetke qaıtarady. 

Atyraý oblystyq kásipkerlik jáne ónerkásip basqarmasynyń bólim basshysy Sáttiǵul Sabyrovtyń málimetine súıensek, memleket tarapynan beriletin qaıtarymsyz grant túri kóp.

«Kásip bastaý úshin bıznes joba usynǵandarǵa memleketten qaıtarymsyz grant qarjysy «Damý» qory arqyly berilip keledi. Mundaı qarjy usynylǵan jobalardy iske asyrýǵa jumsalýy tıis. Alaıda, monıtorıng qorytyndysymen usynylǵan bıznes jobalardyń iske asyrylmaǵany, grant qarjysyn qolma-qol jumsaý deregi anyqtaldy. Qaıtarymsyz grant qarjyny kózdelgen maqsatqa paıdalaný talaby oryndalmaı otyr. Sol sebepten, 21 kásipkerlik sýbektisinen grant qarjysyn bıýdjetke qaıtarý úshin sotqa talap qoıý aryzy joldanǵan edi. Osy kezge deıin 13 kásipkerge qatysty sot sheshimi shyqty. Sot sheshimine sáıkes 13 kásipker 20 mln teńgege jýyq qarjyny bıýdjetke qaıtarýy tıis», - deıdi Sáttiǵul Sabyrov. 

Eske sala ketelik, budan buryn Qulsaryda sý tasqynynan zardap shekken kásipkerlerge 2,6 mlrd teńge ótemaqy taǵaıyndalǵanyn habarlaǵan bolatynbyz.