Atyraý oblysynda 2 júk vagony aýdarylyp, jerge kúkirt tógildi

ATYRAÝ. KAZINFORM – Atyraý oblysynda 4 júk vagony relsten shyǵyp ketip, onyń 2-eýi aýdarylyp qaldy. Sonyń saldarynan jerge kúkirt tógilgen.

Oqıǵa búgin, 7 jeltoqsanda Atyraý oblysynyń Maqat aýdanynda bolǵan.

– Maqat aýdanynda 4 vagony relsten shyǵyp, onyń ekeýi aýdarylǵan. Sonyń saldarynan vagondaǵy kúkirt jerge shashyldy. Qazir jaýapty mamandarǵa vagondardy kóterip, qalpyna keltirýge tapsyrma berilgen. Atyraý oblystyq ekologııa departamentiniń mamandary synama alý úshin oqıǵa ornyna attanyp ketti, - dep habarlady departamenttiń baspasóz qyzmeti.

Eske sala ketelik, budan buryn Atyraý munaı óńdeý zaýytyndaǵy ashyq alańda kúkirt jınaýly turǵanyn habarlaǵan bolatynbyz.

Keıin Atyraý munaı óńdeý zaýytynyń ashyq alańynda kúkirt jınaǵan kompanııaǵa aıyppul salynǵanyn jazǵan edik.

Atyraý oblystyq ekologııa departamentiniń baspasóz qyzmetinen málim etkendeı, 14 qarashada ashyq alańdaǵy kúkirtke baılanysty ujymdyq hat túsken. Osyǵan baılanysty «AMÓZ» JShS men zaýyttyń bazasynyń bir bóligin jalǵa alǵan «Trade Oil Resource» JShS-ǵa jospardan tys tekserý júrgizildi.

Tekserý qorytyndysymen «Trade Oil Resource» JShS-ǵa shaǵyn kásipkerlik sýbekti ekendigi eskerilip, qysqartylǵan is júrgizý tártibimen jalpy somasy 738 myń 400 teńgeni quraıtyn aıyppul salynǵan. Aıyppul qarjysy tolyq óndirilgen.