Atyraý oblysynda 18 kúdiktiniń biri urlaǵan velosıpedter lombardtardan tabyldy

ATYRAÝ. KAZINFORM – Atyraý oblysynyń polıtseıleri jyl basynan beri velosıped urlaǵan 18 kúdiktini ustady. Kúdiktiniń biri urlaǵan velosıpedter lombardtardan tabyldy.

Atyraý oblystyq polıtsııa departamenti krımınaldyq polıtsııa basqarmasynyń jedel ýákili, polıtsııa kapıtany Turlybek Nazymbekovtiń aıtýynsha, munaıly shaharda jıi tirkeletin qylmystyń qatarynda velosıped urlyǵy bar. 

«Polıtsııa qyzmetkerleri qylmystyń qataryna jatatyn urlyqtyń aldyn alý maqsatynda jedel-profılaktıkalyq is-sharalardy turaqty ótkizip keledi. Sondaı is-sharalardyń nátıjesinde jyl basynan beri oblys aýmaǵyndaǵy turǵyn jaılardyń mańynan velosıped urlaýmen aınalysyp júrgen 18 kúdikti anyqtalyp, ustaldy. Urlanǵan velosıpedter ıelerine qaıtaryldy. Máselen, Atyraý qalalyq polıtsııa basqarmasyna qarasty krımınaldyq polıtsııa bóliminiń qyzmetkerleri jedel izdestirý is-sharasy kezinde 2002 jylǵy kúdiktini anyqtady. Kúdiktiniń urlaǵan velosıpedtteri munaıly shahardaǵy lombardtardan tabylyp, tárkilendi», - deıdi Turlybek Nazymbekov. 

Onyń aıtýyna qaraǵanda, kúdikti qamaýǵa alynǵan. Dál osyndaı 4 qylmysqa qatysy bar ekeni anyqtalyp otyr. 

«Óńir turǵyndary men qonaqtaryna bótenniń múlkin jymqyrý, urlaý deregi úshin qylmystyq jaýapkershilik kózdelgenin eskertemiz. Qylmystyń jábirlenýshisi nemese kýágeri bolǵan turǵyndarǵa 102 arnasyna jedel habarlaýdy suraımyz», - dep málim etti Turlybek Nazymbekov.

Eske sala ketelik, budan buryn Atyraýda ózinen 3 jas úlken jigitten 1 mln teńge bopsalaǵan kúdikti ustalǵanyn habarlaǵan edik.