Atyraý oblysynda 15,5 myń tonna kókónis saqtaý qoımasy iske qosyldy
ATYRAÝ. KAZINFORM - Óńirde 15,5 myń tonna syıymdylyǵy bar kókónis saqtaý qoımasyn qamtıtyn zamanaýı «ITC WEST» logıstıkalyq ortalyǵy iske qosyldy, dep habarlaıdy QR aýyl sharýashylyǵy mınıstrliginiń baspasóz qyzmeti.
Baspasóz qyzmetiniń málimetterine qaraǵanda, bul Batys Qazaqstandaǵy iri jáne qazirgi tehnologııalyq deńgeıdegi alǵashqy nysan sanalady. Ol aımaqtaǵy aýyl sharýashylyǵy logıstıkasyn damytýǵa jáne negizgi azyq-túlik ónimderiniń baǵasyn turaqtandyrýǵa baǵyttalǵan.
Logıstıkalyq ortalyqtyń jalpy aýdany 30 gektar. Keshen yńǵaıly kólik aımaǵynda ornalasqan jáne bes temirjol tarmaǵyn, konteıner alańyn, «A» sanatyndaǵy 5 400 sharshy metrlik qoımalardy, óndiristik keshender men kókónis saqtaý qoımasyn qamtıdy.
Qoımanyń jalpy aýdany 8 200 sharshy metr. Nysanda –25 °C-ten +25 °C-qa deıingi temperatýralyq rejımi retteletin 28 saqtaý kamerasy bar. Qoıma avtomattandyrylǵan temperatýra men ylǵaldylyqty baqylaý júıelerimen, zamanaýı salqyndatý quraldarymen, jeldetý jáne aýa raıyn basqarý júıelerimen jabdyqtalǵan. Bul keshenniń úzdiksiz jáne tıimdi jumysyn qamtamasyz etedi.
Logıstıkalyq ortalyqtyń basshysy Baýyrjan Jolmuhanovtyń aıtýynsha, ortalyqtyń ereksheligi – banan pisiretin kamerasy. Tutynýshylardyń suranysyna baılanysty banan kezeń-kezeńimen pisirilip, ýaqytynda naryqqa shyǵarylady.
Osyǵan deıin Atyraýdaǵy qoımalarda 11 myń tonna kókónis saqtalǵandyǵy týraly jazdyq.
