Atyraý oblysynda 15 myń bala 1-synypqa qabyldanady
ATYRAÝ. KAZINFORM — Atyraý oblysynda jańa oqý jylynda 15 200 balany birinshi synypqa qabyldaý josparlanyp otyr. Qujat qabyldaý naýqanynyń alǵashqy kezeńinde 10 myńǵa jýyq ótinish túsip, onyń 60 paıyzǵa jýyǵy onlaın formatta rásimdeldi.
Bıyl birinshi synypqa qujat qabyldaý naýqany 18–28 maýsym aralyǵynda ótti. Osy kezeńde óńir boıynsha barlyǵy 9 981 ótinish tirkelgen.
Onyń ishinde 5 959 ótinish elektrondy OQU platformasy arqyly eGov portalyna joldansa, 4 022-si qaǵaz júzinde qabyldanǵan.
Ótinishterdi qaraý barysynda talaptarǵa sáıkes kelmegen 3 810 qujat túzetý úshin keri qaıtaryldy. Qazirgi ýaqytta 6 171 balanyń qujattary maquldanǵan. Onyń ishinde 4 139 oqýshy qazaq tilinde bilim beretin synyptarǵa, al 2 032 oqýshy orys tilinde oqytatyn synyptarǵa qabyldandy.
Oblystyq bilim berý basqarmasynyń bólim basshysy Aınagúl Jumaǵazıevanyń aıtýynsha, ata-analar qujattardy tapsyrý kezinde olardyń tolyq ári qoldanystaǵy talaptarǵa sáıkes rásimdelýine erekshe nazar aýdarýy qajet.
— Qujattardyń tolyq ári durys rásimdelýi ótinishti qaraý merzimin qysqartyp, qabyldaý protsesiniń sapaly ári jedel júrgizilýine múmkindik beredi. Sondyqtan ata-analardan qujattardy tapsyrar aldynda olardyń talaptarǵa sáıkestigin muqııat tekserýdi suraımyz, — dedi Aınagúl Jumaǵazıeva.
Aıta keteıik, birinshi synypqa qujat qabyldaý 31 tamyzǵa deıin jalǵasady.
Buǵan deıin kolledjderde qujat qabyldaý 25 maýsymda bastalatynyn jazǵan edik.
