Atyraý oblysynda 15 myń adam aıyppulyn tólemeıtin boldy
ATYRAÝ. KAZINFORM — Atyraý oblysynda ákimshilik raqymshylyq aıasynda 15 671 adam ákimshilik jaýapkershilikten bosatyldy.
2026 jylǵy 1 shildede Memleket basshysy «Qazaqstan Respýblıkasynyń Konstıtýtsııasynyń qabyldanýyna baılanysty raqymshylyq jasaý týraly» zańǵa qol qoıǵan edi. Zań aıasynda azamattardy ákimshilik aıyppuldardy tóleýden bosatý kózdelgen.
Ákimshilik raqymshylyq Qazaqstan Respýblıkasynyń azamattary bolyp tabylatyn jeke tulǵalarǵa, sondaı-aq jeke kásipkerlerge, jeke notarıýstarǵa, jeke sot oryndaýshylaryna, advokattar men zań konsýltanttaryna qoldanylady.
Zańnyń kúshi Ákimshilik quqyq buzýshylyq týraly kodekstiń 280 babyna, onyń ishinde ishki ister organdarynyń quzyretine jatatyn 58 bapqa taralady. Raqymshylyq zań kúshine engenge deıin ótelmegen barlyq ákimshilik aıyppuldy qamtıdy.
— Raqymshylyq barlyq quqyq buzýshylyqqa birdeı qoldanylmaıdy. Ol qarý men esirtki aınalymyna qatysty quqyq buzýshylyqtarǵa, sottardyń qaraýyna jatatyn isterge, sondaı-aq azamattardyń qaýipsizdigine qaýip tóndiretin jáne qaıtalap jasalǵan óreskel jol qozǵalysy erejelerin buzýǵa qoldanylmaıdy. Olardyń qatarynda mas kúıinde kólik basqarý, jol-kólik oqıǵasyn jasaý nemese oqıǵa ornyn tastap ketý, qarsy baǵytqa shyǵý, jyldamdyqty asyrý, qyzyl jaryqqa ótý, kólik quralyn qujatsyz basqarý jáne temirjol ótkelderinen ótý qaǵıdalaryn buzý sııaqty quqyq buzýshylyqtar bar, — dep habarlady oblystyq polıtsııa departamentiniń baspasóz qyzmeti.
Aıta keteıik, elde ishki ister organdarynyń baǵyty boıynsha amnıstııa shamamen 590 myń azamatqa qatysty qoldanyldy. Sonyń nátıjesinde olarǵa qatysty 1,3 mıllıonnan astam ákimshilik óndirip alý toqtatylyp, jalpy somasy 22 mıllıard teńgeden asatyn aıyppul esepten shyǵaryldy.
