Atyraý oblysynda 15 kún buryn joǵalǵan er adam áli tabylǵan joq

ATYRAÝ. KAZINFORM — Atyraý oblysy Jylyoı aýdanynda 9 qańtarda jiz-túzsiz joǵalyp ketken er adamdy izdestirý jumysy áli jalǵasyp jatyr.

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, 39 jastaǵy er adamnan 9 qańtardan esh derek bolmaı tur.

Er adam Qulsary qalasynan 35 shaqyrym qashyqtyqta ornalasqan Aqkıiztoǵaı eldi mekeninen belgisiz baǵytqa shyǵyp ketken. Onyń osy kezge deıin keri oralmaǵany anyqtalyp otyr. Іzdestirý-qutqarý jumystaryna Jylyoı aýdanyndaǵy №2 órt sóndirý bóliminen 3 qyzmetker, 1 tehnıka, aýdandyq polıtsııa bóliminen 5adam, 1 tehnıka, jergilikti turǵyndardan 4 adam, 1 tehnıka tartylǵan.

«Oblys turǵyndary men qonaqtaryna aýa raıy boljamyn muqııat zerdeleýdi eskertemiz. Eger «112» qyzmetinen daýyldy eskertý habarlansa, eldi mekenderden alys jolǵa shyqpaǵan jón. Qys aılarynda qajetti saqtyq sharalaryn saqtaý qajet», - dep habarlady departamenttiń qoǵammen baılanys toby.

Eske sala ketelik, Atyraý oblysynda 11 kún buryn iz-túzsiz joǵalǵan er adam áli tabylmaı jatqanyn jazǵan edik.

Jylyoı aýdanynyń 1985 jylǵy turǵyny 9 qańtarda túngi saǵat 22:30 shamasynda anasyna «Zırattyń janynda kele jatyrmyn. Adasyp kettim» dep habarlasqan. Sodan keıin baılanys úzilgen.