Atyraý oblysynda 149 myń oqýshy jıyntyq baǵalaýdan bosatyldy

ATYRAÝ. KAZINFORM – Sý tasqynyna baılanysty Atyraý oblysynda 149 myń oqýshy bólim jáne toqsan boıynsha jıyntyq baǵalaýdan bosatyldy.

Atyraý oblystyq bilim basqarmasy basshysynyń orynbasary Oryntaı Bımanovanyń aıtýynsha, Oqý-aǵartý mınıstrliginiń 10 sáýirdegi hattamasyna sáıkes, osyndaı sheshim qabyldanǵan. 

«Mınıstrliktiń hattamasynda sý tasqyny bolyp jatqan aımaqtardaǵy oqýshylar bólim boıynsha jıyntyq (BJB) jáne toqsan boıynsha jıyntyq baǵalaýdan (TJB) bosatylatyny naqty aıtylǵan. Osyǵan baılanysty oqýshylar kúndelikti onlaın sabaqqa qatysyp, ár pánnen tapsyrma oryndaý arqyly formatıvtik qalyptastyrýshy baǵasyn alady. Qazir oblys mektepterinde dáris alyp júrgen 149 myń oqýshy bar. Olardyń bári BJB jáne TJB-dan bosatyldy», -dep habarlady Oryntaı Bımanova.

Onyń aıtýyna qaraǵanda, Atyraý oblysynda oqýshylarǵa 9 myńǵa jýyq pedagog dáris beredi. Olardyń arasynda biliktilik sanatyn arttyrýǵa arnalǵan attestatsııadan ótetin muǵalimder bar. 

«Sý tasqynyna baılanysty muǵalimderdiń attestatsııadan ótý merzimine ózgeris engizildi. Bıylǵy attestatsııa tamyz aıyna ótedi», -dep málim etti Oryntaı Bımanova. 

Eske sala ketelik, budan buryn Atyraý qalasyndaǵy mektepterde sabaq onlaın ótetinin habarlaǵan edik.