Atyraý oblysynda 14,5 myń adam jumyssyzdar esebinde tur

ATYRAÝ. KAZINFORM – Atyraý oblysynda resmı jumyssyzdar esebinde 14,5 myń adam tur. Jalpy jumyssyzdyq deńgeıi – 4,9 paıyz. Onyń 2,5 paıyzyn jastar qurap otyr. 

Atyraý oblysy ákiminiń orynbasary Jasulan Bısembıevtiń tóraǵalyǵymen jumyspen qamtý baǵytynda atqarylǵan jumystar jáne eńbek ahýalynyń jaı-kúıi talqylanǵan jıyn ótti. Oǵan Atyraý qalasy men 7 aýdan ákiminiń orynbasarlary, basqarma basshylary men óńirdegi birqatar kompanııanyń ókilderi qatysty.

Atyraý oblysy boıynsha eńbek mobıldigi ortalyǵynyń basshysy Qaırat Omarovtyń málimetinshe, mansap ortalyqtaryna 2507 adam jumyspen qamtý máselesine baılanysty júgingen. 

– Jumysyzdardyń ishinde 2 143 adamǵa qoldaý kórsetildi. Al, jumysynan aıyrylǵan 1 282 adam járdemaqy aldy. Turaqty jumyspen 861 adam qamtyldy. «Teńiz» ken ornyndaǵy jobanyń qurylys jumystary aıaqtalýyna baılanysty Atyraý oblysynan 4 myńnan astam adam jumystan bosatyldy. Osyǵan baılanysty munaı kompanııasynyń qoldaýymen qaıta daıarlaý kýrstary uıydastyrylyp, 6 mamandyq boıynsha 225 adam biliktiligin jetildirdi. Qazir jumyssyzdar esebinde 1 188 ınjenerlik-tehnıkalyq qyzmetker tirkeldi, - dep habarlady Qaırat Omarov. 

Onyń deregine qaraǵanda, 2025-2029 jyldary júzege asyrylatyn ınvestıtsııalyq jobalarǵa jumyssyzdar esebindegi 1 188 ınjenerdi qaıta daıarlaý kýrstarynda oqytyp, jumyspen qamtýǵa tolyq múmkindik bar. 

– Jumyssyzdardyń sanyn azaıtý úshin qolǵa alynǵan istiń biri – naryqqa qajetti maman ıelerin anyqtaý. Mansap ortalyqtary 122 iri kásiporynǵa hat joldap, qajetti mamandardyń tizimin jasaqtaıdy. Sonyń qorytyndysyna sáıkes jumyssyz júrgenderdi qyzmetpen qamtý josparlanyp otyr, - dedi Qaırat Omarov. 

Ákim orynbasary Jasulan Bısembıevtiń pikirinshe, basqarmalar kadr sanyn josparǵa saı kóbeıtýi qajet. 

– Óńirdegi iri ınvestıtsııalyq jobalarda jergilikti mamandardyń jumysqa ornalasýyn uıymdastyrýǵa basymdylyq berilýi kerek. Ásirese, probatsııa esebinde turǵandar men jazasyn ótep shyqqan azamattardy jumyspen qamtý sharasyna mán bergen jón, - dedi Jasulan Bısembıev. 

Statıstıkalyq málimetke sáıkes jumyssyzdyq deńgeıi 4,9 paıyzdy qurap otyr. Onyń ishinde jumyssyz jastardyń úlesi – 2,5 paıyz. Bıyl 11 aıda 18 myń 808 adam turaqty jumysqa ornalasty. Bul kórsetkish ótken jylǵy kórsetkishpen salystyrǵanda eki esege artty. Qazir 14 myń 555 adam resmı jumyssyz retinde esepke alynǵan. 

Eske sala ketelik, buǵan deıin Atyraý oblysyna kóship kelgen 239 etnıkalyq qazaq qandas mártebesin alǵanyn habarlaǵan edik.