Atyraý oblysynda 124 mln teńge alıment qaryzy óndirildi
ASTANA. KAZINFORM — Atyraý oblystyq prokýratýrasy atqarýshylyq is júrgizýdegi zań buzýshylyqtardy anyqtady.
Oblys prokýratýrasy atqarýshylyq is júrgizý salasyndaǵy zańnamanyń saqtalýyn turaqty baqylaýda ustap keledi.
Jyl basynan beri zań buzýshylyqtardy joıý maqsatynda 29 prokýrorlyq usynys engizildi. Sonyń nátıjesinde memleket paıdasyna 137,8 mln teńge óndirildi.
— Sondaı-aq 124 mln teńge alıment qaryzy men 842 myń teńge jalaqy boıynsha bereshek óteldi. Zań talaptaryn buzǵany úshin 35 sot oryndaýshysy tártiptik jaýapkershilikke, al 68 boryshker ákimshilik jaýapkershilikke tartyldy, — delingen vedomstvo habarlamasynda.
Balalardy asyraýǵa arnalǵan qarajatty tóleýden jaltarý faktileri boıynsha QR Qylmystyq kodeksiniń 139-babymen 18 sotqa deıingi tergep-tekserý bastaldy. Qazirgi tańda alty boryshker qylmystyq jaýapkershilikke tartyldy.
Máselen, 2026 jylǵy 19 mamyrda Atyraý oblysynyń kámeletke tolmaǵandardyń isteri jónindegi mamandandyrylǵan aýdanaralyq soty alıment boıynsha 7 mln teńge qaryzy bar, eki jyldan astam ýaqyt boıy kámeletke tolmaǵan balalaryna alıment tólemegen «K» esimdi azamatty bir jylǵa bas bostandyǵyn shekteý jazasyna kesti.
Buǵan deıin Túrkistan oblysynda 50 boryshker alıment tólemegeni úshin ákimshilik jaýapqa tartylǵanyn jazdyq.
