Atyraý oblysynda 12 myń oryndyq stadıonnyń qurylysy bastaldy
ATYRAÝ. KAZINFORM – Atyraýda 12 myń kórermenge arnalǵan zamanaýı stadıon qurylysy bastaldy. Bul –óńirdegi iri jobalardyń biri. Ol aımaqtyń sporttyq ınfraqurylymyn damytýǵa jáne buqaralyq sportty qoldaýǵa baǵyttalǵan, dep habarlaıdy Óńirlik kommýnıkatsııalar qyzmeti.
Nysan Atyraý-2 shaǵyn aýdanynda shamamen 10 gektar aýmaqta ornalasady. Qazir joba memlekettik saraptamadan ótip, qurylysqa daıyndyq jumystary júrgizilip jatyr. Atap aıtqanda, jer telimi tegistelip, qurylys tehnıkasy jumyldyrylyp jatyr. Aıta keteıik, nysan qurylysy Memleket basshysynyń óńirge jumys sapary barysynda bergen tapsyrmasyna sáıkes júzege asyryldy.
Oblystyq qurylys, sáýlet jáne qala qurylysy basqarmasy basshysynyń orynbasary Darhan Tilepbergenniń aıtýynsha, stadıon UEFA IV sanatyna saı salynyp, halyqaralyq jarystardy ótkizýge múmkindik bermek.
– Keshenniń ortalyq bóligi halyqaralyq standarttarǵa sáıkes keletin ólshemi 105×68 metr bolatyn fýtbol alańy bolady. Trıbýnalar shatyrynyń eń bıik núktesi 28 metr. Sonymen qatar stadıonda halyqaralyq deńgeıdegi buqaralyq aqparat quraldary ókilderine arnalǵan oryndar, sondaı-aq múmkindigi shekteýli azamattarǵa arnalǵan 200 oryn qarastyrylǵan. Trıbýnalardyń astynda sportshylar men kelýshilerge arnalǵan fýnktsıonaldyq aımaqtar, sonyń ishinde boks, kúres, ıoga, velosport, tennıs jáne basqa da sport túrlerine arnalǵan zaldar ornalasady. Stadıonnyń qurylymy tek fýtbol matchtaryn ǵana emes, regbı jáne amerıkalyq fýtbol jarystaryn ótkizýge de qolaıly, – dedi D.Tilepbergen.
Jobany iske asyrý merzimi – 18 aı. Qurylys jumystaryn 2027 jyldyń sońyna qaraı aıaqtaý josparlanyp otyr.
