Atyraý oblysynda 12 myń oryndyq 7 jańa mektep paıdalanýǵa berildi
ATYRAÝ. KAZINFORM — Atyraý oblysynda 2026–2027 oqý jylynda 7 mektep paıdalanýǵa berilip, oqýshylar zamanaýı bilim nysandarynda oqýyn bastady. Bilim oshaqtary Atyraý qalasy, Qurmanǵazy jáne Jylyoı aýdandarynda ornalasqan.
1 qyrkúıekte Damby aýylyndaǵy 300 oryndyq, Kóktem jáne Erkinqala-2 aýyldyq okrýgterindegi árqaısysy 600 oryndyq mektepterde alǵashqy qońyraý soǵyldy.
Sonymen qatar «Keleshek mektepteri» ulttyq jobasy aıasynda Qurmanǵazy aýdanyndaǵy Qurmanǵazy jáne Aqkól aýyldarynda 600 oryndyq eki mektep, al Jylyoı aýdanynyń Qulsary qalasynda 1200 oqýshyǵa arnalǵan bir mektep paıdalanýǵa berildi.
Budan bólek, Atyraý qalasynda 2 myń oqýshyǵa shaqtalǵan Caspian BINOM School alǵashqy oqýshylaryn qabyldady.
Mektepter zamanaýı oqý kabınetteri, zerthanalar, kitaphanalar, sport jáne akt zaldary, ashanalarmen jabdyqtalǵan. «Keleshek mektepterinde» STEM, robototehnıka jáne IT baǵytyndaǵy kabınetter men shyǵarmashylyq sheberhanalar da qarastyrylǵan.
Al Shoqan Ýálıhanov atyndaǵy № 9 jalpy bilim beretin mektep kúrdeli jóndeýden keıin qaıta ashyldy. 1176 oqýshyǵa arnalǵan bilim ordasynda oqý kabınetteri tolyq jańartylyp, qajetti qural-jabdyqtarmen qamtyldy.
Bıyl Atyraý oblysynda 155 myńnan astam oqýshy jańa oqý jylyn bastady. Onyń 15 myńǵa jýyǵy mektep tabaldyryǵyn alǵash ret attady.
Óńirde bilim berý ınfraqurylymyn damytý jumystary jalǵasýda. Jyl sońyna deıin taǵy eki mektep pen bir óner mektebin paıdalanýǵa berý josparlanǵan. Qazir oblysta 14 mekteptiń qurylysy júrip jatyr.
