Atyraý oblysynda 11 aıda 3109 adam qyzylsha juqtyrǵan

ATYRAÝ. KAZINFORM — Atyraý oblysynda byltyrǵy 2 naýryzdan beri 3 109 adamnyń qyzylshamen aýyrǵany anyqtalyp otyr.

Atyraý oblystyq sanıtarııalyq-epıdemıologııalyq baqylaý departamenti baspasóz qyzmetiniń aqparatyna qaraǵanda, bul — bıylǵy 2 aqpanǵa deıin tirkelgen derek.

«Atyraý oblysynda 2023 jyldyń 2 naýryz – 2 aqpan aralyǵynda alǵashqy dıagnozy boıynsha qyzylshaǵa kúdikti 8 816 jaǵdaı tirkeldi. Zerthanalyq jolmen 3 109 jaǵdaıda qyzylsha aýrýy dáleldendi. Qazir 1 639 taldaýdyń zerthanalyq qorytyndysy áli anyqtalmady. Atyraý oblysyna Túrkııadan — 3, Tájikstannan — 2, Birikken Arab Ámirliginen 1 adam qyzylshany juqtyryp kelgen. Al, Almaty qalasynan — 1, Astana qalasynan — 1, Túrkistan oblysynan — 1,Aqtóbe oblysynan kelgen 6 adamnan qyzylshany aýrýy anyqtaldy», - dep habarlady departamenttiń baspasóz qyzmeti. 

Qyzylshany juqtyrý deregi Atyraý qalasy men 7 aýdanda da tirkelip otyr. Máselen, Atyraý qalasynda 2 637 adam qyzylshamen aýyrǵan. Al, Jylyoı aýdanynda 123, Maqatta — 79, Isataıda — 65, Qurmanǵazyda — 62, Mahambette — 57, Qyzylqoǵada — 48, Inder aýdanynda 38 adamnan qyzylsha anyqtalǵan. 

Departamenttiń málimetine súıensek, Atyraý oblysynda 2019 jyly qyzylsha aýrýynyń 774 deregi tirkelgen. Al, 2021-2022 jyldary bul aýrý tirkelgen joq. Byltyrǵy 2 naýryzda Túrkııadan kelgen azamattyń balasy qyzylshany juqtyryp kelgen. 

Eske sala ketelik, budan buryn Atyraý oblysynda 2 309 adam qyzylsha juqtyrǵanyn jazǵan bolatynbyz.