Atyraý oblysynda 104 jastaǵy áje úıinde daýys berdi

ATYRAÝ. KAZINFORM – Atyraý oblysynda turatyn 104 jastaǵy Shámil Ómirjanova referendýmda úıinde daýys berdi.

Ol Reseımen shekaradaǵy Qurmanǵazy aýdanynyń Buzaýslan aýylynda turady. Bıyl sáýirde 104 jasqa tolǵan.

Tyl ardageri 7 qyz men 2 uldy ómirge ákelgen. Ul-qyzdaryan 8 nemere, 80-nan astam jıen-jıenshar, 20-ǵa jýyq shóbere súıip otyr.

Ǵasyrdan da uzaq ǵumyr jasaǵan keıýana referendýmda úıinen daýys berý úshin ótinish túsirgen. Onyń ótinishine sáıkes №172 referendým ýchaskesiniń komıssııa músheleri ájeıdiń úıine bıýlleten men jáshik alyp keldi.

«Elimizdiń irgesi berik bolsyn. Qazaq jastarynyń bilimdi, saýatty, ónegeli, bir-birimen tatý bolǵanyn qalaımyn. Sonda ǵana eldiń bolashaǵy jarqyn bolady», -dep batasyn berdi Shámil Ómirjanova.

Eske sala ketelik, budan buryn Atyraý oblysyndaǵy munaıshylar jumys ornynda daýys berip jatqanyn habarlaǵan edik.

Sondaı-aq, Atyraýda tirkelmegen saılaýshylar qalaı daýys beretinin jazǵan bolatynbyz.

Atyraý oblystyq aýmaqtyq referendým komıssııasynyń málimetinshe, daýys berý quqyǵy bar azamattardyń sany – 411 880. Daýys berýdiń ashyqtyǵy men zańdylyǵyn baqylaıtyn 7 uıym akredıttelgen.

«Búgin óńirde 283 referendým komıssııasy jumys isteıdi. Onyń 9-y — aýmaqtyq, 274-i — ýchaskelik. Jalpy komıssııalarda 2037 múshe bar. Daýys berý protsesi vahtalyq qalashyqtarda ótip jatyr. Bul jumysty 38 ýchaskelik komıssııa júzege asyrady. Barlyq ýchaske materıaldyq-tehnıkalyq jabdyqtarmen qamtamasyz etilgen», -dep habarlady oblystyq aýmaqtyq komıssııadan.