Atyraý oblysynda 1 jylda 250 keliden astam esirtki tárkilengen
ATYRAÝ. KAZINFORM – Atyraý oblysynda byltyr esirtkimen baılanysty 107 qylmys tirkelgen. Al zańsyz aınalymnan 250 keliden astam esirtki tárkilengen.
Atyraý oblystyq polıtsııa departamenti esirtki qylmysyna qarsy is-qımyl basqarmasy bastyǵynyń orynbasary Roman Ermuhanovtyń málimetinshe, esirtki tasymaldaǵan 46 adam ustalǵan.
– Byltyr Atyraý oblysynda esirtkige qatysty 173 quqyq buzýshylyq tirkeldi. Onyń ishinde 107 qylmys jáne 66 zań talabyn buzý deregi bar. Zańsyz aınalymnan 250 keliden astam ártúrli esirtki zattary tárkilendi. Esirtki tasymalymen ustalǵan 46 adamnyń arasynda 7 áıel men 2 jasóspirim bar. Olardyń jartysy ózge óńirlerden kelgen, - dep málim etti Roman Ermuhanov.
Onyń deregine qaraǵanda, ınternet jelisinde esirtkini jarnamalaǵan 246 saıttyń deregi Іshki ister mınıstrligine buǵattaý úshin joldanǵan. Sondaı-aq 100-den astam graffıtı jazbasy joıylǵan.
– Esirtki qoldanyp, kólik júrgizgen 51 adam ustaldy. Sot sheshimimen olar kólik júrgizý quqyǵynan aıyryldy. Oblys aýmaǵynda 2 fıtozerthana anyqtalyp, 72 túp sora ósimdigi tárkilendi, - deıdi Roman Ermuhanov.
Eske sala ketelik, budan buryn Atyraýda 331 qylmysty ashýǵa kóshe kamerasynyń kómegi tıgenin habarlaǵan edik.