Atyraý oblysynan tabylǵan kıik óleksesine baılanysty tergeý júrip jatyr

ATYRAÝ. KAZINFORM — Atyraý oblysynda 38 kıiktiń óleksesi tabylǵan edi. Osy derekke baılanysty tergeý bastaldy. 

Orman sharýashylyǵy jáne janýarlar dúnıesi komıtetiniń málimetine súıensek, atalǵan derek Mahambet aýdandyq ishki ister bóliminde Qylmystyq kodekstiń 339-babynyń 2-bóligimen tirkelgen.

«Atyraý oblysy Mahambet aýdanynyń Tańdaı aýyldyq okrýgine qarasty Qalmaqty aýylynyń mańynda 38 bas kıik óleksesi tabylǵan edi. Keıinnen Baqyt Qametovtiń Facebook jelisinde jarııalaǵan derek boıynsha materıaldar 2024 jylǵy 26 qańtarda Mahambet aýdandyq PB Qylmystyq kodekstiń 339-babynyń 2-bóligimen tirkeldi. Tergeý amaldary júrgizilip jatyr. Onyń nátıjesi qosymsha habarlanady»,-dep málim etti komıtetten.

Belgili bolǵandaı, Atyraý oblysy aýmaǵynda kıik sanyn retteý sharalary bekitilgen algorıtmge sáıkes 16 qańtarda bastalǵan.

«Kıik sanyn retteý «Ohotzooprom» ınspektorlarynyń tikeleı qatysýymen júzege asady. Bekitilgen algorıtmge sáıkes retteý nátıjesinde alynǵan kıik ushalary mindetti túrde asqazan-ishek jolyn alyp tastap, ishki músheleri, basy jáne terisimen veterınarlyq baqylaý úshin et kombınatyna jiberiledi. Mal dárigerleri ushalardy qarap baıqaǵan soń veterınarııalyq anyqtama beredi. Kıik múıizderi belgilengen talaptardy saqtaı otyryp, «Ohotzooprom» derıvattarǵa esep júrgizetin jaýapty qyzmetkeriniń jáne aýmaqtyq orman sharýashylyǵy jəne janýarlar dúnıesi ınspektsııasynyń memlekettik ınspektorlarynyń baqylaýymen bólinedi. Keıinnen «Ohotzooprom» saqtaýǵa jiberý úshin mindetti túrde tańbalaýǵa jatady», -dep habarlady komıtetten.

Eske sala ketelik, budan buryn Atyraý oblysynda 38 kıiktiń óleksesi tabylǵanyn bolatynbyz.