Atyraý oblysynan kúz aılarynda 492 bozbala áskerge attandy

Atyraý oblysynda kóktemgi jáne kúzgi shaqyrý kezeńinde 1 087 bozbala Otan aldyndaǵy azamattyq boryshyn óteýge attandy. Onyń ishinde 595 jas jigit kóktemde, al, 492-si kúzde áskerge shaqyrylǵan, dep habarlaıdy Kazinform.

Atyraý oblystyq jumyldyrý daıarlyǵy jáne azamattyq qorǵaý basqarmasynyń basshysy Esmuhan Qajkenovtiń aıtýynsha, sońǵy jyldary jastardyń tarapynan áskerge barýǵa qulshynys baıqalyp otyr.

«Bıylǵy kóktemde Atyraý oblysynan 633 jasty áskerge shaqyrý josparlanǵan edi. Kóktemgi áskerge shaqyrý naýqanynda 595 jas ásker qataryna shaqyryldy. Bul jospardaǵy kórsetkishtiń 94 paıyzyn qurady. Al, kúzgi shaqyrý kezeńindegi josparda 652 bozbalany Otan aldyndaǵy azamattyq boryshyn óteýge jiberý kózdeldi. Osy kezge deıin 492 atyraýlyq áskerge attandy», - dep habarlady Esmuhan Qajkenov.

Onyń málimetinshe, kúzgi jospar 75 paıyzǵa oryndalǵan. Jospardyń tolyq oryndalmaýynyń birneshe sebebi bar. Birinshi sebep jastardyń densaýlyǵymen baılanysty bolyp otyr. Ekinshiden, keıbir bozbalanyń áskerge barýǵa yntasy bolmaǵan.

«Atyraý oblysynda áskerı qyzmetke shaqyrýdy uıymdastyrý men qamtamasyz etý is-sharalaryna jergilikti bıýdjetten 124 mln teńgeden astam qarjy bólindi. Áskerge attanǵan atyraýlyqtar Qarýly kúshter, memlekettik kúzet qyzmeti, shekara qyzmeti, Tótenshe jaǵdaılar mınıstrligi men Ulttyq ulannyń áskerı bólimderinde boryshyn júr», - dep málim etti Esmuhan Qajkenov.

Eske sala ketelik, budan buryn Atyraý oblysynda bos júrgen 10 718 jastyń úshten biri jumysqa ornalasqanyn jazǵan edik.