Atyraý oblysyna úsh aıda 32 myńnan astam týrıst kelgen
ATYRAÝ. KAZINFORM – Atyraý oblysyna úsh aıda 32 myńnan astam týrıst kelgen. Týrısterdiń arasynda 5 myńnan astam sheteldik bar.
Atyraý oblystyq dene shynyqtyrý, sport jáne týrızm basqarmasy týrızmdi damytý bólimi basshysynyń mindetin atqarýshy Jannat Sabyrǵalıevanyń aıtýynsha, 200-den astam týrıstik mekeme tirkelgen. Onyń ishinde 127 orny bar. Al, 41 nysanda jol boıyndaǵy servıstik qyzmet kórsetiledi.
«Týrıstik qyzmet salasynda 48 kompanııa tirkelip otyr. Onyń 11-i týroperator, 37-si fırma, 2 etnoaýyl jáne 1 vızıt ortalyǵy bar. Bıylǵy qańtar-naýryz aılarynda Atyraý oblysyna 32 myńnan astam týrıst keldi. Týrısterdiń 27 myńy – qazaqstandyq, al, 5 myńnan astamy – sheteldikter. Óńir turǵyndary men qonaqtaryn qyzyqtyratyn birneshe týrıstik baǵyt anyqtalyp otyr. Týrıster Inder aýdanyndaǵy Tuzdykólge, Qurmanǵazy aýdanynyń aýmaǵymen ótetin Qıǵash ózenindegi «Lotos» alqabyna, Jylyoı aýdanynda ornalasqan Aqkegershin borly taýyna, Isataı aýdanyndaǵy Naryn qumyna, Mahambet aýdanyndaǵy Ortaǵasyrlyq Saraıshyq keshenine, Atyraý qalasynyń mańyndaǵy «Aqjaıyq» memlekettik tabıǵı rezervatyna jıi barady. Óıtkeni, atalǵan oryndardan Atyraýdyń biregeı tabıǵaty men mádenı murasyn tamashalaýǵa bolady», - dep habarlady Jannat Sabyrǵalıeva.
Onyń aıtýynsha, tabıǵat sıpattaǵy tótenshe jaǵdaı kezinde týrıstik maýsym keıinge shegerilgen. Atyraý oblysynyń ákimi Ssrik Shápkenovtiń sheshimimen jarııalanǵan tótenshe jaǵdaı rejımi áli de saqtalyp otyr.
«Qazir jaǵdaı turaqtala kelgendikten, ekskýrsııalyq týrlardy jandandyrýdy josparlap otyrmyz. Ony týrıstik uıymdar arqyly uıymdastyramyz. Aldymen týrıstik oryndardy birge aralap, jaı-kúıin tekserýdi oılastyrdyq», - deıdi Jannat Sabyrǵalıeva.
Al, «Easy Travel» týrıstik fırmasynyń basshysy Nuralhan Bısenovtiń aıtýynsha, shetelge saıahattaıtyn atyraýlyqtar az emes.
«Jaz mezgilinde demalysyn shetelde ótkizetin atyraýlyqtar óte kóp. Olardyń basym bóligi Túrkııanyń Alanıa qalasyna, Egıpettiń Sharm-el-Sheıh qalasyna barady. Sońǵy kezde Azııa elderine qyzyǵýshylyq baıqalyp otyr. Máselen, maýsym aıynda Taıland pen Vetnamdaǵy kýrýorttyq aımaqqa barý úshin joldama alýǵa suranys kóbeıdi», - deıdi Nuralhan Bısenov.
Eske sala ketelik, buǵan deıinBıyl Atyraýdan Reseı shekarasyna deıin qatynaıtyn joldy jańǵyrtý aıaqtalatynyn habarlaǵan edik.
