Atyraý oblysyna tótenshe jaǵdaı kezinde qoldanylatyn L-410 ushaǵy jetkizildi

ATYRAÝ. KAZINFORM — Atyraý oblysynda tótenshe jaǵdaı kezinde jedel áreket etý úshin L-410 ushaǵy qoldanylady. 

Tótenshe jaǵdaılar mınıstri, general-maıor Shyńǵys Árinovtiń aıtýynsha, bul ushaq «Kazavıaqutqarý» AQ-nyń batys aımaqtyq basqarmasynyń avıatsııalyq parki teńgeriminde bolady. 

— Birinshiden, bul ushaq Tótenshe jaǵdaılar mınıstrligi quramyndaǵy avıatsııalyq qyzmettiń jedeldigin arttyrady. Ekinshiden, tótenshe jaǵdaılarda jedel áreket etý múmkindigin keńeıtedi, -dedi Shyńǵys Árinov.

Mınıstrdiń málimetinshe, L-410 ushaǵy Chehııa Respýblıkasynda shyǵarylǵan. Bul — eýropalyq Aircraft Industries kompanııasynyń jańartylǵan kóp maqsatty týrbovınttik áýe kemesi. Onyń kabınasy Garmin-3000 avıonıka júıesimen jabdyqtalǵan. Mundaı júıe navıgatsııalyq dáldikti arttyryp, ushýdy barynsha qaýipsiz etedi.

Zamanaýı ushaq 19 adamdy nemese 2-3 tonnaǵa deıin júk tasymaldaı alady. Maksımaldy ushý jyldamdyǵy — saǵatyna 417 shaqyrym. Áýe kemesi -50°C-dan +50°C-ge deıingi ekstremaldy temperatýra jaǵdaıynda usha beredi. Sondaı-aq, 500 metrlik arnaıy daıyndalǵan jolaqqa ushyp-qonady.

— Ushaq bortynda zamanaýı zembilder, aýyr naýqastardy tasymaldaýǵa arnalǵan jabdyqtar bar. Ushý kezinde syrqattardyń ómirin saqtaýdy qamtamasyz etetin qosymsha jabdyq ornatýdyń múmkindigi qarastyrylǵan, - dedi mınıstr. 

Eske sala ketelik, budan buryn Kaspıı jaǵalaýynda 450 gektardy sharpyǵan qamys órti sóndirilgenin habarlaǵan edik.