Atyraý oblysyna sáýir aıyna 7,4 myń tonna suıytylǵan munaı gazy bólindi

ATYRAÝ. KAZINFORM – Atyraý oblysyna sáýir aıynda 7 myń 429 tonna suıytylǵan munaı gazy jetkiziledi. 

Atyraý oblystyq energetıka jáne turǵyn úı-kommýnaldyq sharýashylyq basqarmasynyń basshysy Aıdýlat Kenjebekovtiń málimetinshe, Energetıka mınıstrliginen taǵy da 2 myń tonna suıytylǵan munaı gazyn suraý kózdelip otyr.

– Atyraý oblysynyń ishki naryǵyna sáýir aıyna 7 myń 429 tonna suıytylǵan munaı gazy bólindi. Іshki naryqtaǵy gaz qajettiligin qamtamasyz etý úshin Mınıstrlikten qosymsha 2 000 tonna suıytylǵan munaı gazy kólemi suralady. Qazir Atyraý qalasy men aýdandarda ornalasqan beketterge suıytylǵan munaı gazynyń atalǵan kólemin taratý júrip jatyr, - dep habarlady Aıdýlat Kenjebekov. 

Onyń aıtýyna qaraǵanda, óńirde 101 avtogaz quıý beketi bar. Qazir suıytylǵan munaı gazynyń jetkilikti qory jasaqtalǵan. Suıytylǵan gaz tapshylyǵy týyndamaıdy.

Eske sala ketelik, buǵan deıin Atyraýda suıytylǵan munaı gazyn saqtaıtyn kompanııa negizsiz kiris tapqanyn jazǵan edik.