Atyraý oblysyna kóship kelgen 239 etnıkalyq qazaq qandas mártebesin alǵan

ATYRAÝ. KAZINFORM – Bıyl Atyraý oblysyna shet memleketterden 239 etnıkalyq qazaq kóship keldi. Olarǵa qandas mártebesi berilgen.

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasy basshynyń mindetin ýaqytsha atqarýshy Erkebulan Ábilqasymovtyń aıtýyna qaraǵanda, qandastar 7 memleketten qonys aýdarǵan. 

«Bıyl jyl basynan beri Atyraý oblysyna Ózbekstan, Reseı Federatsııasy, Qytaı, Túrikmenstan, Ýkraına, Tájikstan men Túrkııa elinen 198 otbasy kóship keldi. Bul otbasylardaǵy 239 etnıkalyq qazaq qandas mártebesin aldy. Olardyń arasynan 21 qandas jumyssyz retinde tirkelgen edi. Qazir olardyń 7-eýi turaqty jumysqa ornalasty. Endi tirkeýge alynǵan ózge qandastardy jumyspen qamtý máselesi qarastyrylyp otyr. Osyǵan baılanysty olarǵa túrli mekemedegi bos jumys oryndary usynyldy», - dep habarlady Erkebulan Ábilqasymov.

Onyń pikirine súıensek, Qazaqstanǵa kóship kelýge nıet bildirgenderdiń ulty qazaq ekenin rastaıtyn qujaty bolýy qajet.

«Mundaı qujaty bolmasa, kóship kelýshilerdiń ultyn aıqyndaý máselesi arnaıy komıssııada qaralady. Keıin jergilikti atqarýshy organ atalǵan komıssııanyń usynysy negizinde qandas mártebesin berý nemese bas tartý týraly sheshim qabyldaıdy», -dep málim etti Erkebulan Ábilqasymov.

Eske sala ketelik, budan buryn Ábıba Ábýjaqynova dzıýdodan Qazaqstannyń eńbek sińirgen sport sheberi ataǵyn alǵanyn  habarlaǵan bolatynbyz.