Atyraý oblysyna qyzylshaǵa qarsy vaktsınanyń 20 myń dozasy jetkizildi

Atyraý oblysynda qyzylsha dertin 2290 adam juqtyrǵan. Sol sebepten, qyzylshaǵa qarsy vaktsınanyń 20 myń dozasy jetkizildi. Apta sońyna deıin taǵy 19 myń dozany jetkizý kózdelip otyr, dep habarlaıdy Kazinform.

Oblystyq densaýlyq saqtaý basqarmasynyń basshysy Qaısar Abdalıevtiń aıtýynsha, osy kezge deıin qyzylshaǵa qarsy 21 227 turǵyn ekpe alǵan.

«Sońǵy eki jylda Atyraý oblysynda qyzylsha aýrýyn juqtyrý deregi tirkelmegen edi. Alaıda, qazir bul aýrý órship tur. Osy kezge deıin 2 290 atyraýlyq qyzylsha juqtyrdy. Sol sebepten, ujymdyq ımmýnıtet qalyptastyrý kerek. Óıtkeni, ınfektsııa aýa tamshylary arqyly taralady. Qyzylshamen aýyrmaǵan, tipti oǵan qarsy ekpe almaǵan adamdar ómir boıy qyzylshaǵa óte sezimtal bolady. Olar kez-kelgen jasta aýyrýy múmkin. Bul aýrýdyń aldyn alýdyń jalǵyz joly – vaktsına», - dep málim etti Qaısar Abdalıev.

Onyń deregine súıensek, Atyraý oblysynan qyzylsha, qyzamyq, parotıtke qarsy ekpeniń 39 myń dozasyna tapsyrys berilgen.

Qazir mamandar Atyraýǵa jetkizilgen vaktsına dozalaryn qalalyq jáne aýdandyq emhanalarǵa bólip, taratyp jatyr.

Eske sala ketelik, budan buryn Atyraýda qyzylsha aýrýyn juqtyrǵandar aýrýhanaǵa ózderi barǵanyn habarlaǵan edik.