Atyraý oblysyna qarasty aýdanda 423 azamattyń zeınetaqy jáne áleýmettik tólemderi ýaqytyly túspegen
ATYRAÝ.KAZINFORM — Atyraý oblysy Mahambet aýdanynyń prokýratýrasy júrgizgen tekserý nátıjesinde eńbek jáne zeınetaqy zańnamasynyń talaptary óreskel buzylǵany anyqtaldy. Prokýratýranyń málimetinshe, jalpy sany 423 azamattyń quqyǵy buzylǵan.
Naqtyraq aıtqanda, ortalyq aýdandyq aýrýhananyń laýazymdy tulǵalary qoldanystaǵy zań talaptaryn saqtamaı, 338 qyzmetkerdiń mindetti zeınetaqy jáne áleýmettik aýdarymdaryn ýaqytyly tólemegen. Qaryz kólemi 29 mıllıon teńge.
— Prokýratýranyń aralasýynan keıin ǵana zań buzýshylyqtar joıylyp, tıisti qarajat tolyq kólemde biryńǵaı jınaqtaýshy zeınetaqy qoryna aýdaryldy. Sonymen qatar, osyndaı zań buzýshylyqtar «Mahambet Sý» kommýnaldyq memlekettik mekemesinde de tirkelgen. Munda 85 qyzmetkerge qatysty 21 mıllıon teńge kóleminde mindetti jarna tólenbegeni belgili boldy, — dep málimdedi aýdandyq prokýratýra.
Qadaǵalaý aktileri negizinde atalǵan mekemelerdiń basshylary Qazaqstan Respýblıkasynyń Ákimshilik quqyq buzýshylyq týraly kodeksiniń 91 jáne 92 baptary boıynsha ákimshilik jaýapkershilikke tartylǵan.
Buǵan deıin Astana qalasynyń prokýratýrasy ınvestorlardyń quqyqtaryn qorǵaý baǵytyndaǵy jumysty jalǵastyryp, 30-dan astam zańsyz sheshimniń jolyn keskenin jazǵan edik.
