Atyraý oblysyna 5 aıda shetelden 108 qandas kóship keldi

ATYRAÝ. KAZINFORM – Atyraý oblysyna 5 aıda shetelden 108 etnıkalyq qazaq kóship keldi. Qandastardyń deni buryn Ózbekstan Respýblıkasynda turǵan.

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń baspasóz qyzmetinen málim etkendeı, 1 maýsymǵa deıin 6 elden atamekenge oralǵandardyń bári qandas mártebesin alǵan.

«Atyraý oblysyna bıylǵy 5 aıda shet elderden 89 otbasy kóship keldi. Bul otbasylardyń bári, ıaǵnı 108 adam etnıkalyq qazaqtan quralǵan. Qazaqstan Respýblıkasyna turaqty turý maqsatynda kelgen etnıkalyq qazaqtar qandas mártebesin aldy. Qandastardyń deni – 86 múshesi bar 71 Ózbekstan Respýblıkasynan qonys aýdardy. Al, Reseı Federatsııasynan 9 otbasy (10 adam), Qytaı Halyq Respýblıkasynan 6 otbasy (9 adam), Ýkraınadan, Tájikstan men Túrikmenstan Respýblıkasynan 3 otbasy (3 adam) oraldy», -dep habarlady basqarmanyń baspasóz qyzmeti.

Qandastardyń arasynan 78 otbasy Atyraý qalasynda turaqtap qalýdy jón kórgen. Bul otbasylarda 97 adam bar. Al, 4 otbasy (4 adam) Jylyoı aýdanyn, 1 otbasy (1 adam) Mahambet aýdanyn tańdapty. Sondaı-aq, Maqat 2 otbasy (2 adam), Qurmanǵazyǵa 2 otbasy (2 adam) jáne Inder aýdanyn 2 otbasy (2 adam) kóship barǵan.

«Qazir Atyraý oblysynda qandastardy ýaqytsha ornalastyrý ortalyǵy jumys isteıdi. Biraq, bul ortalyqta ýaqytsha turatyn etnıkalyq qazaqtar tirkelmegen. Al, turǵyn úı kezeginde 43 qandas tirkeýde tur. Mansap ortalyqtarynda 14 qandas jumyssyz retinde tirkeýge alyndy. Áleýmettik jumys ornyna 1, qoǵamdyq jumysqa 1 adam tartyldy», -dep málim etti basqarmanyń baspasóz qyzmetinen.

Eske sala ketelik, budan buryn byltyr Atyraý oblysyna shetelden 272 etnıkalyq qazaq kóship kelgenin jazǵan edik.