Atyraý oblysyna 2,4 trln teńgege ınvestıtsııa tartyldy

Atyraý oblysyna tartylǵan ınvestıtsııalar kólemi 2,4 trln teńgeni qurady. Onyń ishinde shetelden 3,5 mlrd AQSh dollaryna tikeleı sheteldik ınvestıtsııa quıyldy. Bul týraly Atyraý oblysynyń ákimi Serik Shápkenov málimdedi, dep habarlaıdy Kazinform.

«Investıtsııalar tartý boıynsha bizdiń oblys respýblıkada aldyńǵy orynda tur. Negizgi kapıtalǵa salynǵan ınvestıtsııalar kólemi 2,4 trln teńgeni qurady. Onyń ishinde syrtqy ınvestıtsııa – 902,5 mlrd teńge, ishki ınvestıtsııa – 1 533,6 mlrd teńge. Tutastaı alǵanda, elimizge tartylǵan ınvestıtsııalardaǵy Atyraýdyń úlesi 18,3%-dy quraıdy, - dedi Serik Shápkenov Ortalyq kommýnıkatsııalar qyzmet alańynda ótken baspasóz máslıhatynda. 

Sondaı-aq oblys ákimi óńirde atqarylyp jatqan ınvestıtsııalyq jobalar týraly aıtty. 

«Ótken jyly Atyraý oblysynda eki aýqymdy joba aıaqtaldy. Atap aıtqanda, «NCOC» kompanııasynyń teńiz túbin tereńdetý jobasy jáne «KRІ» JShS polıpropılen óndirý jobasy. Bıyl 3,5 mlrd AQSh dollaryna tikeleı sheteldik ınvestıtsııa tartyldy. Onyń ishinde, taý-ken ónerkásibi jáne karerlerdi qazýǵa 3,4 mlrd AQSh dollary, qurylysqa 114,2 mln AQSh dollary, kásibı, ǵylymı-tehnıkalyq qyzmetke 22,9 mln AQSh dollary, odan bólek 3,8 mln AQSh dollaryna ınvestıtsııa tartyldy», - deıdi ol.