Atyraý oblysyna 1 myńnan astam áskerı qyzmetshi kómekke keldi
ATYRAÝ. KAZINFORM – Atyraý oblysyna Qarýly Kúshterdiń 1 myńnan astam áskerı qyzmetshi kómekke keldi.
Atyraý garnızony baspasóz qyzmetiniń málimetinshe, Qorǵanys mınıstriniń nusqaýyna sáıkes tasqyn sýǵa qarsy is-sharalarǵa járdem kórsetý úshin «Ońtústik» óńirlik qolbasshylyǵynyń áskerı qyzmetshileri jiberilgen.
Áskerı qyzmetshiler legin «Ońtústik» óńirlik qolbasshylyǵy áskerleriniń qolbasshysy general-maıor Qýanyshbek Úshtaev basqaryp keldi. Áskerılerdi Mahambet, Inder aýdandarynyń eldi mekenderi men Atyraý qalasynyń mańyndaǵy Jańatalap aýylyna kómekke jiberý josparlanyp otyr. Onda olar jaǵalaýdy nyǵaıtý jumystaryn júrgizedi.
«Temirjolmen jetkizilgen birikken quram Shymkent, Taraz jáne Gvardeısk garnızondarynda ornalasqan áskerı bólimderden qurylǵan. Sondaı-aq 60-tan astam áskerı jáne arnaıy tehnıka bar. «Bizdiń «Ońtústik» óńirlik qolbasshylyǵynyń áskerı qyzmetshileri Atyraý qalasyna kómektesý maqsatymen keldi. Sondyqtan olardy jumysqa baptaýdyń qajeti joq. Biz elimizdiń jáne halyqtyń qaýipsizdigin qamtamasyz etýge baılanysty kez kelgen mindetti oryndaýǵa daıynbyz», - dedi Shymkent qalasynan kelgen toptyń aǵa polkovnıgi Aıbar Abaıuly.
Eske sala ketelik, budan buryn áskerı qyzmetshiler 6 oblysta sý tasqyny saldaryn joıýǵa kómektesip júrgeni habarlanǵan edi.
