Atyraý oblysynda júrgizýshiden 84 keli bekire men 2 keli qara ýyldyryq tárkilendi

Atyraýda oblysynda 52 jastaǵy júrgizýshi bekire tuqymdas balyqty zańsyz tasymaldaý kúdigimen ustaldy. Polıtsııa qyzmetkerleri onyń kóliginen 84,9 keli bekire men baǵaly balyqtyń 1,9 keli qara ýyldyryǵyn tárkiledi, dep habarlaıdy Kazinform.

Atyraý oblystyq polıtsııa departamenti baspasóz qyzmetiniń aqparatyna qaraǵanda, júrgizýshi Atyraý-Dossor baǵytyndaǵy tas jolynda ustalǵan.

«Polıtsııa qyzmetkerleri kúdik týdyrǵan 1971 jylǵy júrgizýshiniń Lada Vesta avtokóligin toqtatty. Tekserý kezinde kólikten salmaǵy 84,9 kelini quraıtyn 27 dana bekire tuqymdas balyq pen 1,9 keli bekireniń qara ýyldyryǵyn tabylyp, tárkilendi. Ustalǵan júrgizýshige qatysty QR Qylmystyq kodeksiniń 339-babynyń 2-bóligimen (Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sotqa deıingi tergep-tekserý bastaldy», - dep habarlady departamenttiń baspasóz qyzmeti.

Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

«Qazaqstan Respýblıkasy Konstıtýtsııasynyń 77-babynyń 3-tarmaǵynyń 1-tarmaqshasy, QR Qylmystyq-protsestik kodeksiniń 19-babynyń 1-bóligine sáıkes adamnyń kináli ekendigi zańdy kúshine engen sot úkimimen tanylǵansha ol jasalǵan qylmysqa kináli emes dep esepteledi», -dep málim etti departamenttiń baspasóz qyzmetinen.

Eske sala ketelik, buǵan deıin Atyraý oblysynda júrgizýshiniń kóliginen 56 keli bekire tárkilengenin habarlaǵan bolatynbyz.