Atyraý oblysy respýblıkalyq jalpy ishki ónimniń 12,7 paıyzyn qamtyp otyr

ASTANA. KAZINFORM – Bıyl Atyraý oblysynda jarty jyldyń ishinde jalpy ishki ónimniń kólemi 6,7 trln teńgege jetti. Bul týraly oblys ákimi Serik Shápkenov málim etti.

— Bıyl jarty jylda oblysta jalpy ishki ónimniń kólemi 6,7 trln teńgege jetti. Osylaısha respýblıkanyń jalpy ishki ónimine bizdiń oblystyń ekonomıkasy 12,7% úles qosyp otyr. Sondaı-aq bıyl 10 aıda óńirge túsken salyq jáne basqa da túsimderdiń kólemi 3,6 trln teńgeni quraıdy, — dedi Serik Shápkenov oblystyń bıylǵy áleýmettik-ekonomıkalyq damý barysy týraly esep bere turyp. 

Odan ári ákim óńir damýyna ınvestıtsııa tartý sharalaryna toqtaldy. 

— Qańtar-qazan aılarynda óńirde 1,7 trln teńge kóleminde ınvestıtsııa quıyldy. Onyń ishinde 1,1 mlrd AQSh dollary shetelden tikeleı tartyldy. Búginde Teńiz ken ornynda «Bolashaq keńeıtý» jobasy aıaqtalýǵa jaqyn, bıyl bul jobaǵa 840 mlrd teńge ınvestıtsııa tartyldy. Sonymen qatar 17 ınvestıtsııalyq jobany iske asyrý josparlanǵan. Búginde jalpy quny 46,1 mıllıard teńgeden asatyn 8 joba iske qosyldy. Jalpy jyl sońyna deıin aımaqta quny 24,2 mlrd teńge bolatyn 9 ınvestıtsııalyq joba jumysyn bastaıdy dep josparlap otyrmyz, — deıdi ol. 

Sondaı-aq Serik Shápkenov elimizdiń munaı-gaz hımııasynyń damýyna serpin beretin polıetılen óndiretin gaz óńdeý zaýytynyń salynyp jatqanyn aıtty.