Atyraý oblysy Qurmanǵazy aýdanyna jańa ákim taǵaıyndaldy
ATYRAÝ. KAZINFORM - Oblys ákimi Bolat Aqsholaqovtyń ókimimen jáne Qazaqstan Respýblıkasy Prezıdenti Ákimshiliginiń, aýdandyq máslıhat depýtattarynyń kelisimimen Qurmanǵazy aýdanynyń ákimi bolyp Nursultan Bısembıev taǵaıyndaldy.
Nursultan Bısembıev esepshi-aýdıtor jáne ekonomıst mamandyqtary boıynsha bilim alǵan.
2013-2017 jyldar aralyǵynda Atyraý oblystyq tekserý komıssııasynda operatordan bas ınspektor-baqylaýshyǵa deıingi túrli laýazymda eńbek etti.
2017 jylǵy mamyrda Atyraý oblystyq qarjy basqarmasy basshysynyń orynbasary bolyp taǵaıyndalyp, 2017 jylǵy qazannan bastap óńirdiń qarjy basqarmasyn basqardy.
2019 jylǵy qarashadan 2022 jylǵy tamyzǵa deıin Qyzylqoǵa aýdanynyń ákimi qyzmetin atqardy.
2022–2024 jyldary Atyraý oblysy ákiminiń keńesshisi bolyp jumys istedi. 2024 jylǵy 31 mamyrdan bastap Atyraý oblysy boıynsha Tekserý komıssııasynyń múshesi boldy.
Oblys ákimdigi taratqan aqparatqa súıensek, jańa ákimge halyqty jumyspen qamtý, ınjenerlik ınfraqurylymdy jańǵyrtý, jylý berý naýqanyna daıyndyq, aýyl sharýashylyǵy men balyq sharýashylyǵyn damytý syndy mindetter júkteldi.
Buǵan deıin Atyraý oblysy ákiminiń orynbasary Jasulan Bısembıev basqa qyzmetke aýysýyna baılanysty jumysynan ketti.
