Atyraý oblysy: Inderde – 15, Mahambet aýdanynda 22 evakýatsııalyq pýnkt daıyn tur
ATYRAÝ. KAZINFORM – Búgin Atyraý oblysynyń eki aýdanynda Jaıyq ózeniniń deńgeıi qaýipti shekten asty. Osyǵan baılanysty Inderde – 15, Mahambet aýdanynda 22 evakýatsııalyq pýnkt daıyn tur.
Mahambet aýdandyq bilim bóliminiń basshysy Venera Qabyshevanyń aıtýynsha, Mahambet aýdanynda evakýatsııalyq pýnktterge tasymaldaý shemasy daıyndalǵan.
«Eldi mekenderdi sý basqan jaǵdaıda turǵyndardy tasymaldaýǵa 24 avtobýs pen GAZel bólindi. Buǵan qosymsha jeńil kólikter de tasymal jumysyna qosylatyn bolady. Bul kóliktermen bir mezgilde 200 adam tasymaldanady. Kólikterdiń qozǵalys marshrýttary anyqtaldy», - dep habarlady Venera Qabysheva.
Al, Inder aýdany ákimdiginiń aqparatyna súıensek, munda 15 evakýatsııalyq pýnkt ashylǵan.
Bul aýdandaǵy Inderbor kenti men 6 okrýgtegi 11 eldi mekende 33 myńǵa jýyq turǵyn tirkelgen. Onyń ishinde 15 mektepte oqıtyn 6407 oqýshy bar.
«Qurylys aýylynda ornalasqan M.Móńkeuly atyndaǵy orta mekteptiń 129 oqýshysy onlaın oqýǵa jiberildi. Bul mektepte jaǵalaýdy bekitýge kómekke kelgen 150 sarbazǵa jatyn oryn daıyndaldy», - dep habarlady aýdandyq ákimdikten.
Eske sala ketelik, buǵan deıin Jaıyq ózeniniń sýy Inder aýdanynda qaýipti deńgeıden asyp ketkenin habarladyq.
Sondaı-aq, Inder aýdanynda 25 myń maldy qaýipsiz aýmaqqa shyǵarý josparlandy.
Atyraýdyń taǵy bir aýdanynda Jaıyq ózeniniń deńgeıi qaýipti shekten asty.
