Atyraý oblysy: «Aqjaıyq» rezervatynda eki kún janǵan qamys órti óshirildi

ATYRAÝ. KAZINFORM – Atyraý oblysyndaǵy «Aqjaıyq» rezervatynda eki kún buryn qamys órtengen edi. Búgin keshte Kaspıı teńiziniń jaǵalaýyndaǵy jalyn óshirildi. 

Atyraý oblystyq tótenshe jaǵdaılar departamenti qoǵammen baılanys tobynyń málimetinshe, rezervat aýmaǵyndaǵy jalyn 9 qazanda anyqtalǵan.

«Keshe 10 qazanda Atyraý qalasynyń mańyndaǵy Erkinqala aýylynan 40 shaqyrym qashyqtyqta qamys órti oqshaýlanǵan edi. Búgin, 11 qazanda saǵat 18:00-de qamys órti tolyq óshirildi. Órtti sóndirýge tótenshe jaǵdaılar departamenti men «Aqjaıyqı memlekettik tabıǵa rezervatynan 43 qyzmetker, 16 tehnıka tartyldy», - dep habarlady departamenttiń qoǵammen baılanys toby. 

Atyraý oblystyq tótenshe jaǵdaılar departamenti memlekettik órt baqylaý basqarmasynyń bastyǵy, azamattyq qorǵaý podpolkovnıgi Baǵdat Abdýllın órttiń tutanýyna adam faktory áseri bolýy múmkin ekenin joqqa shyǵarmaıdy.

«Qazir ańshylyq maýsymy ótip jatyr. Qamys órtiniń tutanýyna ańshylardyń dalada ot jaǵýy men temeki tuqylyn tastaýy sebep bolýy múmkin», - dedi Baǵdat Abdýllın.

Eske sala ketelik, buǵan deıin Atyraýda «Aqjaıyq» tabıǵı rezervatynyń aýmaǵynda qamys janyp jatqanyn jazǵan edik.

Al, keshe Atyraýdaǵy qamys órtinen aýada lastaýshy zattar shekti mólsherden asqanyn habarlaǵan bolatynbyz.

Oblystyq ekologııa departamenti basshysynyń mindetin atqarýshy Erlan Esenovtiń aıtýyna qaraǵanda, Atyraý qalasynyń birneshe bóliginde tútinniń ıisine baılanysty atsosferalyq aýanyń sapasyna monıtorıng júrgizilgen.

«Monıtorıng kezinde kúkirtti sýtek, kómirtek, azot dıoksıdi sekildi lastaýshy zattardyń ıngrıdentteri qamtyldy. Aýaǵa taraǵan zııandy zattardyń shekti mólsherden asý deregi tirkeldi», - dep málim etti Erlan Esenov.