Atyraý oblysy ákimi «Sýdoremontnık» stadıonynyń rekonstrýktsııasyn aıdyń aıaǵyna deıin támamdaýdy tapsyrdy
ATYRAÝ. KAZINFORM — Atyraý oblysynyń ákimi Bolat Aqsholaqov «Sýdoremontnık» stadıonyna baryp, nysannyń jaǵdaıymen jáne qaıta jańǵyrtý jumystarynyń barysymen tanysty.
Búginde «Sýdoremontnık» stadıonynda «Atyraý» fýtbol klýbynyń oıynshylary jattyǵady. Bul nysanǵa «Munaıshy» stadıonyndaǵy rekonstrýktsııaǵa baılanysty taǵy bir mańyzdy mindet júkteldi. Endi munda «Atyraý» FK-nyń óz alańyndaǵy matchtary ótedi. Qazir stadıondaǵy negizgi qurylys jumystary shamamen 90%-ǵa aıaqtalǵan. Bas merdiger — «YAAY» JShS.
— Nysanda 20 maman jumys istep jatyr, 6 tehnıka jumyldyrylǵan. Rekonstrýktsııa aıasynda ǵımarattyń shatyry tolyq jóndelip, jaryqtandyratyn dińgekter qondyryldy. Úsh myń kórermenge arnalǵan minbe ornatylyp, VIP-qonaqtarǵa arnalǵan bólek sektor jabdyqtaldy. Qazirgi ýaqytta rezeńke jabyndy tóseý, kireberisti árleý jáne kishigirim qurylys jumystary aıaqtalýǵa taıaý. Kesteden belgili bir deńgeıde aýytqý bar, oǵan minbeler men metall konstrýktsııalar jasap shyǵaratyn kórshiles Reseı zaýytynyń tapsyrysty kesh jetkizýi sebep boldy. Kelisimsharttaǵydan eki ese uzaq ýaqyt ketti, — dedi joba jetekshisi Azamat Kenjeǵalıev.
Endi merdiger bul olqylyqtyń ornyn toltyrýy shart. Oblys ákimi qalǵan jumystyń barlyǵyn qyrkúıektiń aıaǵyna deıin bitirýdi tapsyrdy.
Jumystyń sapasy men oryndalý merzimi stadıonnyń aldaǵy taǵdyryn aıqyndamaq. «Sýdoremontnık» rekonstrýktsııadan soń Qazaqstan fýtbol Federatsııasynyń sertıfıkatsııasynan ótýi tıis. Sol sebepti aımaq basshysy merdigerge belgilengen merzimde stadıonnyń tolyq daıyndyǵyn qamtamasyz etýdi júktedi. Onyń taǵy bir mańyzdy sebebi — «Sýdoremontnık» stadıonynda 14 qazanda «Atyraý» fýtbol klýby óz alańynda «Elimaı» komandasyn qabyldaýǵa tıis.
Komanda stadıondy kelesi maýsymda da, ıaǵnı «Munaıshy» rekonstrýktsııasy aıaqtalǵansha paıdalanady.
Buǵan qosa, fýtbolshylar turatyn jáne jattyǵatyn korpýs pen bazanyń ishki bólmeleri de jóndelip jatyr. Qyrkúıektiń aıaǵyna deıin belgilengen birinshi kezeń dálizder men sanıtarlyq aımaqtardy taqtashalarmen qaptaý, esikterdi qondyrý, qabyrǵalardy kosmetıkalyq árleý, bólmelerdi jýynatyn kabınalar men sanıtarlyq toraptary bar kıim aýystyratyn oryn retinde qaıta josparlaý jumystaryn qamtıdy.
Merdiger jylytý, elektrmen jabdyqtaý, jeldetý jelilerin, terezeler men santehnıkany tolyq jańartýǵa oıyn maýsymy aıaqtalǵan soń kirisedi.
