Atyraý munaı óńdeý zaýytynyń mańyndaǵy kóshetterge las sý quıylǵan ba

ATYRAÝ. KAZINFORM – Atyraý munaı óńdeý zaýytynyń mańynda egilgen kóshetterge las sý quıylǵan. Biraq bul derekti kásiporynnyń baspasóz qyzmeti joqqa shyǵardy.

Búgin áleýmettik jelide munaı óńdeý zaýytynyń tóńiregindegi kóshetterge las sý quıylǵany týraly vıdeo júkteldi. 

Atyraý munaı óńdeý zaýyty baspasóz qyzmetiniń aqparatyna qaraǵanda, kóshetterge quıylatyn sý Jaıyq ózeninen alynady. 

— Áleýmettik jelide taraǵan beınejazbanyń naqty qashan túsirilgeni belgisiz. Alaıda, bir nárse anyq — zaýyttaǵy sýarý júıesiniń munaı ónimderimen eshqandaı baılanysy joq. Jasyl beldeýdegi tal-terekti sýarý úshin sý Jaıyq ózeninen alynady. Kóktemgi alǵashqy sýarý kezinde sýdyń túsi ýaqytsha kúńgirttenýi múmkin. Sý quramyndaǵy organıkalyq zattar men túrli tabıǵı tunbanyń bolýyna baılanysty onyń túsi ózgeriske ushyraıdy. Bul jaǵdaı tal-terekke eshqandaı zııanyn tıgizbeıdi. Osyǵan baılanysty taralǵan aqparattyń negizsiz ekenin málimdeımiz. Jalǵan málimetterge senbeýge jáne tek resmı derekkózderge júginýge shaqyramyz, — dep habarlady kásiporynnyń baspasóz qyzmeti.

Eske sala ketelik, budan buryn Atyraý munaı óńdeý zaýytynyń mańynda káriz sýy aǵyp jatqanyn jazǵan bolatynbyz.