Atyraý munaı óńdeý zaýytynyń mańynda káriz sýy aǵyp jatyr

ATYRAÝ. KAZINFORM – Atyraý munaı óńdeý zaýytynyń mańynda káriz sýy aǵyp jatqanyn oblystyq ekologııa departamentiniń baspasóz qyzmeti rastady. Dál qazir oblystyq ekologııa departamentiniń mamandary oqıǵa ornynda tekserý júrgizýdi bastady. 

– Atyraý munaı óńdeý zaýytynyń mańynda shoıyn turbadan káriz sýy aǵyp jatyr. Bul – «Atyraý oblysy Sý Arnasy» KMM-niń kárizdik-sorap stansasyna baratyn qubyry. Qazir mekeme mamandary aqaýdyń saldaryn anyqtap, joıý jumysyna kiristi, - dep habarlady departamenttiń baspasóz qyzmeti. 

Osyǵan oraı Atyraý munaı óńdeý zaýytynyń baspasóz qyzmeti túsinik berdi. 

– Zaýyttyń ekologtary men ekologııa departamentiniń mamandary oqıǵa ornyna dereý baryp, tıisti tekserý júrgizdi. Nátıjesinde qara tústi suıyqtyqtyń káriz júıesinen aǵyp jatqany anyqtaldy. Bul aqaý AMÓZ-diń aýmaǵynda emes. Zaýyttyń óndiristik júıelerine qatysy joq. Kásiporyn shtattyq rejımde jumys istep tur. Óndiristik protsester turaqty júrip jatyr, - dep málim etti zaýyttyń baspasóz qyzmetinen.

Al «Atyraý oblysy Sý Arnasy» KMM-niń baspasóz qyzmetinen málim etkendeı, qubyrdan shyqqan aǵyndy sýdy sorý bastalǵan. 

– Aqaýdyń aldyn ala sebebi káriz jelisiniń buzylýynan bolýy múmkin. Onyń naqty sebebi tekserýden soń belgili bolady, - dep habarlady mekemeniń baspasóz qyzmeti. 

Eske sala ketelik, budan buryn Atyraýda munaı tasıtyn tsısternalardy jýý-býlaý stansasy tekserilip jatqanyn jazǵan edik.